Նոր սարքավորումներ՝ համակարգչից օգտվող հաշմանդամություն ունեցող անձանց կյանքը հեշտացնելու համար․ ՏԵՍԱՆՅՈՒԹ

Հայաստանում ավելի քան 190 հազար մարդ հաշմանդամություն ունի։ Այս մարդկանցից շատերը զրկված են ոչ միայն ազատ տեղաշարժի, այլև համակարգչից ու այլ սարքերից օգտվելու հնարավորությունից։

Key-X կոչվող առաջին բազմաֆունկցիոնալ ստեղնաշարը եկել է հեշտացնելու համակարգչից օգտվող հաշմանդամություն ունեցողների կյանքը։ Այն հնարավորություն է տալիս շարժողական, ֆիզիկական և մտավոր առողջական խնդիրներ ունեցող անձանց օգտագործել ցանկացած համակարգիչ, սմարթֆոն կամ պլանշետ։ Ստեղնաշարը կիրառելու համար անհրաժեշտ է սարքը միացնել համակարգչին և միավորել գունային մի քանի կոճակ։ Այն կարելի է օգտագործել նաև աչքերը թարթելու միջոցով։ Աչքերի թարթումը ֆիքսող հարմարանքը պարզապես պետք է ամրացնել ակնոցին, որն իր հերթին միացվում է կցորդ սարքին և Key-X-ին։ Արդյունքում հնարավոր է դառնում տեքստ հավաքել, նկարել կամ այլ գործողություն կատարել՝ միայն աչքերը թարթելու միջոցով։ 11 ստեղն ունեցող սարքավորումը ստեղծվել է հենց հաշմանդամություն ունեցող անձի կողմից։

ՀՀ Աշխատանքի և սոցիալական հարցերի նախարարությունը ՅՈՒՆԻՍԵՖ-ի հայաստանյան գրասենյակի աջակցությամբ ուսումնասիրում է հաշմանդամություն ունեցող անձանց համար ստեղծված այս նորագույն միջոցները։

Աշխատանքի և սոցիալական հարցերի փոխնախարարն ընդգծում է՝ աջակցող միջոցների ֆունկցիոնալությունը դիտարկելուց և դրանք ձեռք բերելուց հետո հաշմանդամություն ունեցող անձինք կրթվելու, ժամանցն ավելի հետաքրքիր դարձնելու և ավելի ներառական միջավայր ունենալու հնարավորություն կունենան։

Աջակցող նորագույն միջոցները տեղի գործընկերներին ներկայացնելու և վերապատրաստման դասընթացներ անցկացնելու նպատակով օրերս Հայաստան են ժամանել Key2enable կազմակերպության ներկայացուցիչները։ Վերապատրաստման դասընթացների մեկնարկը տրվեց այսօր։ Դրանք կտևեն մինչև օգոստոսի 4-ը։

Key2enable կազմակերպության ղեկավար և համահիմնադիր Ջոուզ Ռուբինգերը նշում է, որ աջակցող այս սարքը ստեղծվել է Բրազիլիայում, ապա կիրառվել Ամերիկայի Միացյալ Նահանգներում։ Այն օգնում է հաշմանդամություն ունեցող անձանց՝ բացահայտել իրենց իրական ներուժը, հնարավորություն ընձեռում ավելի անկախ և ինքնուրույն կյանք վարել։

Սարքը տրամադրվում է դպրոցներին, խնամքի հաստատություններին, որտեղ ուսուցիչները, յուրացնելով գործիքը, սովորեցնում են երեխաներին։ Կազմակերպության ղեկավարը կարևորում է այն, որ սարքը բարելավել է հազարավոր մարդկանց կյանքի որակը։

Նախաձեռնության շրջանակում 2 օրվա ընթացքում կվերապատրաստվեն Աշխատանքի և սոցիալական հարցերի նախարարության խնամքի հաստատությունների, հատուկ և ներառական կրթություն իրականացնող դպրոցների և այլ կենտրոնների ավելի քան 70 մասնագետներ։ Միայն դրանից հետո նախարարությունը կդիտարկի սարքի արդյունավետությունը և դրական եզրակացություն ստանալուց հետո Հայաստանում ևս կներդրվի Key-X ստեղնաշարը։

Մանրամասները՝ տեսանյութում։

Արփի Հակոբյան