ՍԴ-ն հակասահմանադրական է ճանաչել «Բարձագույն կրթության և գիտության մասին» օրենքի որոշ դրույթներ

Սահմանադրական դատարանն այսօր ընդունած որոշմամբ հակասահմանադրական է ճանաչել «Բարձագույն կրթության և գիտության մասին» օրենքի երկու մասերը:

Ինչպես Factor.am-ի հետ զրույցում նշեց ՍԴ մամուլի քարտուղար Եվա Թովմասյանը, հակասահմանադրական են ճանաչվել օրենքի 27-րդ հոդվածի 3-րդ և 4-րդ մասերը:

Փաստաթղթի 3-րդ մասը սահմանում է՝

«Հանրային բուհի կառավարման խորհուրդը ձևավորվում է հետևյալ համամասնությամբ՝ չորսին առաջադրում է բուհի ակադեմիական խորհուրդը, որոնց ներկայացվող պահանջները, առաջադրման և լիազորությունների դադարեցման կարգը սահմանվում են բուհի կանոնադրությամբ, հինգին՝ նշանակում համապատասխան լիազոր մարմնի ղեկավարը»։

Օրենքի 27-րդ հոդվածի 4-րդ մասը սահմանում է՝

«Կառավարման խորհրդի բուհի չորս անդամներին սույն հոդվածի 6-րդ մասում սահմանված ժամկետում չառաջադրելու կամ չորսից պակաս առաջադրելու դեպքում կառավարման խորհրդի բուհի կողմից չառաջադրված անդամների համալրումն իրականացնում է համապատասխան լիազոր մարմնի ղեկավարը»։

Հիշեցնենք, որ Ազգային ժողովը մարտի 24-ին էր ընդունել «Բարձագույն կրթության և գիտության մասին» օրենքը, որը, սակայն, նախագահ Արմեն Սարգսյանը հրաժարվել էր ստորագրել և ուղարկել էր Սահմանադրական դատարան: Ըստ նախագահի աշխատակազմի ուսումնասիրությունների և փորձագիտական կարծիքների՝ օրենքի առանձին դրույթներ առերևույթ խնդրահարույց են սահմանադրականության տեսանկյունից:

Նշենք, որ բուհական և գիտական մի շարք կառույցներ անընդունելի էին որակել օրենքի նախագծի որոշ դրույթներ։ Մասնավորապես, վիճարահարույց էր հենց Հոգաբարձուների խորհրդի ձևավորման համամասնությանը վերաբերող մասը, ըստ որի՝ խորհրդի 9 անդամներից 5-ը ներկայացնեն Կրթության նախարարությունը, 4-ը՝ բուհը, բացի այդ՝ ընդգծվում էր նաև ռեկտորների ընտրության կարգը: Բուհերի ներկայացուցիչները պնդում էին, որ այդ դրույթները ոտնահարում են բուհական ինքնավարությունն ու ակադեմիական ազատությունը՝ զրկելով ինքնուրույն որոշումներ կայացնելու հնարավորությունից։

Օրենքի քննությունը ՍԴ-ում գրավոր ընթացակարգով ընթանում էր հուլիսի 29-ից: Որոշման ամբողջական տարբերակը կհրապարակվի եռօրյա ժամկետում։