21.04.2026 | 12:06
«Ներքին կարգով եք մրցույթ անում», «Խնդրում եմ լռեք և լսեք». Զարոկյանն ու Ավինյանը բանավիճեցին․ ՏԵՍԱՆՅՈՒԹ
Հունիսին աշխատատեղերի աճի ռեկորդ ունենք. Նիկոլ Փաշինյան
Հասարակություն
22.07.2021 | 11:36
Հանրապետությունում հունիս ամսին ևս շարունակվել է աշխատատեղերի թվի աճի տենդենցը՝ արձանագրելով բացարձակ ռեկորդ: Այդ մասին կառավարության նիստի սկզբում նշեց վարչապետի պաշտոնակատար Նիկոլ Փաշինյանը՝ հավելելով, որ արդեն մի քանի ամիս շարունակում ենք արձանագրել, որ մեր երկրում աշխատատեղերի թիվն աճում է:
Վարչապետի պաշտոնակատարը խնդրեց Պետական եկամուտների կոմիտեի նախագահ Էդվարդ Հովհաննիսյանին՝ ներկայացնել արձանագրված ցուցանիշները:
«Վերջին ամիսների շարունակաբար աշխատատեղերի աճը իր վարքագիծը պահպանել է նաև հունիս ամսվա ընթացքում: Մասնավորապես՝ գրանցված վարձատրվող աշխատատեղերի քանակը կազմել է շուրջ 643 հազար: Այս ցուցանիշը երբևէ նախադեպը չունեցող ցուցանիշ է: Համեմատության համար պետք է ընդգծել, որ այն 34 հազարով ավելի է 2020 թվականից, շուրջ 38 հազարով ավելի է 2019 թվականից և 80 հազարով ավելի է 2018 թվականից: Հատկանշական է նաև, որ հունիս ամսվա ընթացքում նշված աշխատատեղերին վճարված ընդհանուր եկամուտը նույնպես աննախադեպ ցուցանիշ է գրանցել՝ կազմելով շուրջ 139 մլրդ դրամ»,- ասաց Հովհաննիսյանը՝ ավելացնելով, որ այդ ցուցանիշը 2020 թվականի համեմատ ավելի է 19 մլրդ դրամով, 2019-ի համեմատ՝ 26 մլրդ դրամով և 2018-ի համեմատ՝ 40 մլրդ դրամով:
«Բարձր ցուցանիշ է գրանցվել նաև վճարվող եկամուտներից հաշվարկված և վճարված եկամտային հարկի առումով: Առաջին անգամ ամսական կտրվածքով եկամտային հարկի չափը հասել է շուրջ 30 մլրդ դրամի, այս ցուցանիշը նույնպես էականորեն տարբերվում է նախորդ տարիների հունիս ամիսների ցուցանիշից: Բարձր է ստացվել նաև միջին աշխատավարձը՝ ամսական կտրվածքով 216 հազար դրամ: Առաջին անգամ ընդհանուր աշխատատեղերի թիվը նույնպես ամենաբարձրն է գրանցվել՝ վճարվող և չվճարվող աշխատատեղերի մասին է խոսքը՝ այն կազմել է 695 հազար»,- ասաց ՊԵԿ նախագահը:
Նիկոլ Փաշինյանը նշեց, որ այս տարվա առաջին 6 ամսվա տվյալով 28 մլրդ 500 մլն դրամով ավելի շատ եկամտային հարկ են հավաքագրել, քան 2018 թվականին, և սա այն պարագայում, որ եկամտային հարկի դրույքաչափն էականորեն իջեցրել են:
«Ուզում եմ ասել, որ սա այն կոնկրետ դեպքն է, որ կառավարության մտահղացումն իրականություն է դարձել: Այն ժամանակ, երբ մենք եկամտահարկը համահարթ էինք դարձնում, ասում էինք, որ մեր նպատակային թիրախներից մեկը եկամտահարկի հավաքագրման ավելի մեծ ծավալներ ունենալն է, և այդ նպատակն իրագործված է միջնաժամկետում»,- ընդգծեց վարչապետի պաշտոնակատարը:
Մանրամասները՝ տեսանյութում:
