17.09.2026 | 10:29
Արտարժույթների փոխարժեքները՝ սեպտեմբերի 17-ի դրությամբ
Մերկելն ու Բայդենը պայմանավորվել են խաղաղությամբ ավարտել «Հյուսիսային հոսք-2» ռուսական գազատարի շուրջ իրենց հակամարտությունը․ BBC
Քաղաքականություն
22.07.2021 | 12:28
Միացյալ Նահանգներն ու Գերմանիան որոշել են «զինադադար կնքել» «Հյուսիսային հոսք-2» ռուսական գազատարի հարցով իրենց հակամարտության շուրջ։ ԱՄՆ-ը պատժամիջոցներ չի կիրառի գազատարի սեփականատեր Nord Stream 2 AG-ի ու դրա ղեկավարության հանդեպ, Գերմանիան կօգնի զարգացնել Ուկրաինայի էներգետիկ համակարգը, իսկ երկու կողմերը միասին պարտավորվում են ինչ-որ բան ձեռնարկել Ռուսաստանի դեմ, եթե այն փորձի զրկել Ուկրաինային գազային տրանզիտից, գրում է BBC-ի ռուսական ծառայությունը։
«ԳԴՀ-ն պարտավորվել է ազգային մակարդակով , ինչպես նաև ԵՄ մակարդակով քայլեր ձեռնարկել , այդ թվում նաև պատժամիջոցներ, եթե Ռուսաստանը էներգետիկան օգտագործի որպես զենք կամ ագրեսիվ գործողություններ իրականացնի ընդդեմ Ուկրաինայի»,- հայտարարել է ԱՄՆ պետքարտուղարի տեղակալ Վիկտորյա Նուլանդը։
Ուկրաինան՝ մյուս արևելաեվրոպական պետությունների հետ միասին, որոնց տարածքով անցնում է ռուսական գազը, նախկինի նման կոչ է անում փակել «Հյուսիսային հոսք-2» նախագիծն ու ենթադրում է, որ այդ հարցի վերաբերյալ Սպիտակ տան իրական վերաբերմունքը կպարզվի Վաշինգտոն Վլադիմիր Զելենսկիի այցի ժամանակ։ Ինչպես հայտնի է դարձել, այցը կկայանա օգոստոսի 30-ին։
Լրատվականը գրում է, որ ԱՄՆ նոր նախագահ Ջո Բայդենի արտաքին քաղաքական նպատակներից մեկն է կարգավորել հարաբերությունները եվրոպական դաշնակիցների, այդ թվում ՝ Գերմանիայի հետ, որոնք վատթարացել էին իր նախորդի՝ Դոնալդ Թրամփի ղեկավարման օրոք, և Բալթիկ ծովի հատակով Ռուսաստանից Գերմանիա գրեթե ավարտված գազատարի կառուցումը այդ տարաձայնության պատճառներից մեկն էր: Միացյալ Նահանգները պատժամիջոցներ էր կիրառում ծրագրի մասնակիցների դեմ, իսկ Գերմանիայի կառավարությունը պնդում էր, որ խողովակաշարի կառուցումը պետք է ավարտին հասցվի:
Մի քանի ամիս շարունակ Ջո Բայդենի վարչակազմի բարձրաստիճան պաշտոնյաներն ու Անգելա Մերկելի կառավարությունը բանակցություններ էին վարում, թե ինչպես վերջ դնեն տարաձայնություններին։ Այժմ Միացյալ Նահանգները Գերմանիայի հետ պայմանավորվածությունների համաձայն՝ խոստանում է չվերականգնել ընդդեմ Nord Stream 2 AG-ի և դրա ղեկավարության պատժամիջոցները, սակայն սրա հետ մեկտեղ իրեն իրավունք է վերապահում թիրախային պատժամիջոցներ կիրառել ընդդեմ նախագծի մասնակիցների։
Տաթև Ֆռանգյան
