26.04.2026 | 11:13
Վթարային ջրանջատում Երևանում
Կուբայում զանգվածային հակակառավարական բողոքի ցույցերի առաջին զոհն է գրանցվել
Քաղաքականություն
14.07.2021 | 16:07
Կուբայի իշխանությունները հաստատել են անցյալ կիրակի երկրում սկսված բողոքի ցույցերի մասնակիցներից մեկի մահվան մասին տեղեկությունը։ Այս մասին գրում է BBC-ի ռուսական ծառայությունը:
Տեղական լրատվամիջոցների հաղորդմամբ՝ երկուշաբթի 36-ամյա տղամարդ է մահացել Հավանայի արվարձաններից մեկում: Պաշտոնյաները հայտնել են, որ նա եղել է այն խմբում, որը հարձակվել էր կառավարության շենքի վրա:
«Անկարգությունների մասնակիցներից մեկը՝ 36-ամյա Դիուբիս Լաուրենսիո Տեխեդան, զոհվել է։ Նա բնակվել է Արրոյո-Նարանահո քաղաքում, նախկինում եղել է դատապարտված գողության ու խուլիգանության համար»,- ասված է Կուբայի Granma պարբերականի հոդվածում։
Հիշեցնենք՝ Կուբայի մայրաքաղաք Հավանայում և մի շարք այլ քաղաքներում բազմահազարանոց բողոքի ցույցեր են ընթանում կոմունիստական կառավարության դեմ: Ցուցարարները պահանջում են ազատություն, ժողովրդավարություն և ավելի վճռական գործողություններ կորոնավիրուսի համաճարակի դեմ պայքարում:
Այնուամենայնիվ, բողոքի ցույցերի պատճառը միայն համաճարակը չէ: Ցուցարարները վրդովված են էլեկտրաէներգիայի և սննդի աճող դեֆիցիտից:
Տաթև Ֆռանգյան
