19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Ո՞ւր են մեր 320 հազար ընտրողները. Վահե Գրիգորյանը՝ Մուկուչյանին. ՏԵՍԱՆՅՈՒԹ
Քաղաքականություն
13.07.2021 | 12:52
Հաշմանդամ ընտրողների առանձին վիճակագրություն չի վարվում: Այս մասին Սահմանադրական դատարանի նիստում հայտնեց Հայաստանի ԿԸՀ նախագահ Տիգրան Մուկուչյանը՝ պատասխանելով ՍԴ դատավոր Վահե Գրիգորյանի հարցերին: Հիշեցնենք, որ ԿԸՀ-ն որպես պատասխանող կողմ է հանդես գալիս չորս քաղաքական կուսակցությունների և դաշինքների դիմումով, որով վիճարկվում են ընտրությունների արդյունքները:
Մուկուչյանը տեղեկացրեց, որ կարճ ժամանակահատվածում 16 հազար մարդ վերապատրաստվել է ընտրությունների օրը հաշմանդամություն ունեցող անձանց հետ աշխատելու համար: Մուկուչյանը հատկապես ընդգծեց, որ նախատեսվել է տեսողության խնդիրներ ունեցողների՝ քվեարկությանը մասնակցության հնարավորությունը:
Ընտրատարածքներ են հատկացվել հաշմանդամություն ունեցող անձանց քվեարկությունը կազմակերպելու համար: Այնուամենայնիվ, Մուկուչյանը խոստովանեց, որ ոչ բոլոր ընտրատարածքներն են հարմարեցված՝ չկան թեքահարթակներ, դռները բավականաչափ լայն չեն և այլն:
Մուկուչյանը հայտնեց, որ բողոքներ չկան հաշմանդամություն ունեցող անձանց՝ քվեարկությանը մասնակցության անհնարինության մասին` տարածքի հարմարեցված չլինելու պատճառով:
Վահե Գրիգորյանը նշեց, որ 2018թ.-ին արտահերթ խորհրդարանական ընտրություններին մասնակցել է 1 մլն 261 հազար ընտրող, 2017թ.-ի ընտրությունների համեմատ մոտ 320 հազար ընտրող պակաս։ «Ու՞ր են մեր 300-320 հազար ընտրողներն ըստ ձեզ»,-հետաքրքրվեց դատավորը:
ԿԸՀ նախագահն ասաց, որ առիթ են ունեցել վիճարկել 2017թ.-ի ընտրության արդյունքները, ՍԴ-ում ունեցել են գործի քննություն։ «Երբ 2017թ.-ին ներդրվեց ընտրողների ստորագրած ցուցակների հրապարակման մեխանիզմը, դրանից անմիջապես հետո մամուլում եղան հրապարակումներ, որ 800 քաղաքացի չի մասնակցել քվեարկությանը, բայց անգամ ՍԴ-ում գործի քննության ընթացքում չներկայացվեց որևէ ապացույց թեկուզ մեկ քաղաքացու հետ կապված, որ քվեարկության չէր եկել։ Այն ժամանակ էլ վերահսկողական մեխանիզմները լիարժեք կային և եթե մարդը չէր գալիս մասնակցելու ընտրություններին, հեշտությամբ կարող էր ստուգել, պարզել»,- նշեց Տիգրան Մուկուչյանը։
ԿԸՀ նախագահը նկատեց՝ եթե ընտրություններին մասնակցության թիվն իջել է, դա խոսում է այն մասին, որ մարդիկ չեն մասնակցել. «Թե ինչ պատճառներով, անկեղծ ասած մենք չեն ուսումնասիրել»,-հավելեց Տիգրան Մուկուչյանը։
Մանրամասները՝ տեսանյութում:
