19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Գրիգորի Խաչատուրովի ազատումը վրեժխնդրություն էր զինվորականի նկատմամբ. Տիգրան Աբրահամյան. ՏԵՍԱՆՅՈՒԹ
Քաղաքականություն
13.07.2021 | 12:40
Նախընտրական շրջանում ունեցել ենք սպառնալիք, որն արտահայտվել է երկրում բարձրագույն պաշտոն զբաղեցնող անձի կողմից և փաստացի հետընտրական փուլում ականատես ենք լինում այդ սպառնալիքի իրագործմանը։ Լրագրողների հետ զրույցում այս մասին ասաց «Պատիվ ունեմ» դաշինքի անդամ Տիգրան Աբրահամյանը՝ անդրադառնալով Սյունիքի համայնքապետերի կալանավորումներին: Նա նշեց, որ այդ ձերբակալումներն ու կալանավորումները հետապնդումների միայն մի մասն են կազմում։
Անդրադառնալով ՊՆ 3-րդ բանակային կորպուսի հրամանատար Գրիգորի Խաչատուրովի պաշտոնանկությանը՝ Տիգրան Աբրահամյանը նշեց. «Գրիգորի Խաչատուրովը ծառայությունից ազատվել է պայմանագիրը չերկարաձգվելու հիմքով, ակնհայտ է, որ այստեղ կա ընդգծված քաղաքական բաղադրիչ։
Դա սկսվել է դեռևս փետրվարի 25-ի՝ ԳՇ-ի հայտնի հայտարարությամբ, որը ստորագրել էին 40-ից ավել բարձր պաշտոններ զբաղեցնող զինվորականներ։ Այդ գործընթացից հետո նրանցից շատերն ազատվել են պաշտոններից, դա միայն Օնիկ Գասպարյանի, Տիրան Խաչատրյանի վրա չի տարածվում։ Կարծում եմ՝ այս գործընթացը, որի հիմքում վրեժխնդրությունն է զինվորականի նկատմամբ, մեզ որևէ լավ տեղ չի տանի։
Գրիգորի Խաչատուրովի նման այդ սերնդի զինվորականները բավական քիչ են։ Երբ խոսում ենք զինված ուժերի բարեփոխումների մասին, նրա նման զինվորականների հեռացումը խոսում է այն մասին, որ այդ բարեփոխումները սխալ հիմքի վրա են դրված»,- նշեց Տիգրան Աբրահամյանը։
Նա ընդգծեց՝ իշխանությունը չի ներել և չի ներելու այն զինվորականներին, որոնք չեն համաձայնել պետական քաղաքականության հետ, արտահայտել են իրենց դիրքորոշումը։ Տիգրան Աբրահամյանի խոսքով նրանք, ովքեր ներողություն չեն խնդրել, ամենատարբեր փուլերում պատժի են ենթարկվելու: «Այս փուլում պատժի են ենթարկվում այն զինվորականները, որոնք ունեն շատ բարձր հեղինակություն և նրանց «պատժելը» ազդեցություն է ունենալու բոլոր այն զինվորականների վրա, որոնք հետագայում կփորձեն որևէ կերպ դեմ լինել կամ իրենց հրապարակային դիրքորոշումն արտահայտել»,- նշեց Աբրահամյանը:
Մանրամասները՝ տեսանյութում:
