29.06.2026 | 17:10
Ինչո՞ւ և ինչո՞վ եք Ձեզ կաշկանդել․ Սեդա Սաֆարյանը՝ ԿԸՀ նախագահին․ ՏԵՍԱՆՅՈՒԹ
Էրդողանի դիրքերը թուլանում են․ 2023թ. ընտրություններին ընդառաջ թուրք ընտրողները նախընտրում են ընդդիմադիր «Ազգային դաշինքը»
Քաղաքականություն
08.07.2021 | 22:13
Թուրքիայում ընտրողներն առաջին անգամ նախապատվություն են տալիս ընդդիմադիր «Ազգային դաշինքին»՝ նախագահ Ռեջեփ Թայիփ Էրդողանի կողմից ղեկավարվող «Ժողովուրդների դաշինքին»՝ 2023 թվականի ընտրություններին ընդառաջ։ Այս մասին գրում է «Ահվալ» գործակալությունը։
Metropoll-ի հարցումների համաձայն՝ 18-24 տարեկան հարցվածների 44․1 տոկոսը նշել է, որ իրեն ավելի մոտ է զգում «Ազգային դաշինքին», քան գործող կառավարությանը։
Ի տարբերություն դրա՝ «Ժողովուրդների դաշինքին», որը կազմված է իշխող «Արդարություն ու զարգացում» և ուլտրաազգայնական «Ազգայնական շարժում» կուսակցություններից, աջակցում է 36․2 տոկոսը։
Metropoll-ի հիմնադիր ու տնօրեն Օզեր Սենջարը նշել է որ այս արդյունքները կարևոր են ընդդիմության համար, սակայն չի նշանակում, որ պետք է «Ազգային դաշինքին» աջակցությունը երիտասարդ ընտրողների շրջանում գերագնահատել։
«Երկուսի միջև տարբերությունը ցածր է նրանից, ինչ մարդկանց մեծ մասն ակնկալում է։ Թվում է, որ Z սերունդը չի սիրում գործող առաջնորդներին»,- ասել է Սենջարը։
«Ազգային դաշինքը» բաղկացած է երկու գլխավոր ընդդիմադիր ուժերից՝ Ժողովրդա-հանրապետական կուսակցությունից, աջակենտրոն IYI կամ «Լավ» կուսակցությունից, իսլամիստական «Սաադեթ» և Դեմոկրատական կուսակցություններից։
Քրդամետ Ժողովուրդների դեմոկրատական կուսակցությունն այս դաշինքի մաս չէ, սակայն ավանդաբար թուրք երիտասարդ ընտրողների շրջանում լավ ցուցանիշներ է ունեցել։
Թուրքիայի նախագահ Ռեջեփ Թայիփ Էրդողանը, որը պահպանողական ու իսլամիստական քաղաքական գործիչ է, ավելի քիչ ժողովրդականություն է վայելում երիտասարդ ընտրողների շրջանում։ Ըստ որոշ սոցիոլոգների՝ երիտասարդ ընտրողները կարող են նշանակալի փոփոխություն բերել Թուրքիայի հաջորդ՝ 2023 թվականին կայանալիք ընտրություններում։
Էմմա Չոբանյան
