24.08.2026 | 17:12
Իտալական Suardi-ն դիմել է միջազգային արբիտրաժ՝ ընդդեմ Հայաստանի Հանրապետության
ԵՄ-ն պատրաստ է աջակցել Հայաստանին ու Ադրբեջանին կայուն խաղաղության հասնելու համար․ եվրահանձնակատար
Քաղաքականություն
08.07.2021 | 20:02
ԵՄ Հարևանության ու ընդլայնման հարցերով հանձնակատար Օլիվեր Վարհեյը Ադրբեջանի իշխանությունների հետ քննարկել է Լեռնային Ղարաբաղում հետկոնֆլիկտային իրավիճակն ու ԵՄ-ի կողմից աջակցման հնարավորությունները։
«Ես քննարկեցի Ադրբեջանի պաշտոնատար անձանց հետ Լեռնային Ղարաբաղում հետկոնֆլիկտային իրավիճակն ու այն, թե ինչ աջակցություն կարող է ցուցաբերել ԵՄ-ն այդ հարցում»,- Բաքվում լրագրողների հետ զրույցում ասել է Վարհեյը, փոխանցում են ադրբեջանական լրատվամիջոցները։
Նրա խոսքով՝ ԵՄ-ն աջակցություն է ցուցաբերելու տարածաշրջանում երկարատև ու կայուն խաղաղությանը։
«Կողմերը՝ Ադրբեջանն ու Հայաստանը, գերիների և ականների քարտեզների փոխանակումով արդեն իսկ քայլ են արել այդ ուղղությամբ։ ԵՄ-ն ողջունում է այդ փոխանակումը։ Վրաստանի դերակատարումն այդ գործընթացում գովելի է, և ես շնորհավորում եմ դրա կապակցությամբ Վրաստանի վարչապետին, որը կողմերին համոզեց անել այդ քայլը»,- ասել է ԵՄ հանձնակատարը։
Նա նաև նշել է, որ ԵՄ-ն պատրաստ է ցուցաբերել կողմերին ցանկացած օգնություն՝ կայուն խաղաղության հասնելու համար։
«ԵՄ-ին դիմելու դեպքում՝ տարածաշրջանի վերականգնման աջակցման հարցում, ԵՄ-ն միշտ հասանելի կլինի յուրաքանչյուր կողմի համար։ ԵՄ-ն միշտ պատրաստ է ֆինանսական աջակցություն ցուցաբերել»,- ասել է Օլիվեր Վարհեյը։
Նշենք, որ տարածաշրջանային այցի շրջանակում ԵՄ-ի հանձնակատարը մի շարք հանդիպումներ է անցկացրել Ադրբեջանի պաշտոնյաների հետ։ Հունիսի 9-ին նա հանդիպումներ կունենա նաև Հայաստանում։
Էմմա Չոբանյան
