Քաղաքականություն
01.07.2021 | 20:24
Ռուսաստանի դրոշը կշարունակի ծածանվել ՌԴ Պետական Դումայի շենքի վրա: Այս մասին հայտարարել է Կրեմլի խոսնակ Դմիտրի Պեսկովը՝ մեկնաբանելով Ուկրաինայի առաջնորդ Վլադիմիր Զելենսկու խոսքերը, փոխանցում է «Գազետա»-ն։
«Մենք ընդհանուր պատմական ժամանակաշրջան ենք ունեցել, ասել է Ուկրաինայի նախագահը։ Մենք ընդհանուր պատմական ժամանակաշրջան չենք ունեցել․ մենք ընդհանուր պատմություն ունենք։ Եվ, իհարկե, ռուսներն ու ուկրաինացիները, այնուամենայնիվ, մեկ ժողովուրդ են։ Բացարձակ մեկ ժողովուրդ են, այն մեկ ընդհանրություն է։ Եվ այստեղ, երևի, իմաստ չկա շարունակել քննարկումը, ամեն ինչ ակնհայտ է»,- ասել է Պեսկովը։
Կրեմլի ներկայացուցիչը նաև նշել է, որ ուկրաինացիների ատելությունը ռուսների հանդեպ կարող է բացասաբար ազդել հենց իրենց վրա։
«Ողբերգությունն այն է, որ Ուկրաինայում չափազանց շատ ռուսներ կան՝ նրանց ատելու համար և, ի վերջո, այդ ատելությունը կործանարար կլինի հենց երկրի համար»,- բացատրել է Պեսկովը։
Հիշեցնենք, որ Ուկրաինայի նախագահ Վլադիմիր Զելենսկին պատասխանել էր ՌԴ նախագահ Վլադիմիր Պուտինի այն պնդումներին, թե ուկրաինացիներն ու ռուսները մեկ ժողովուրդ են՝ արհեստականորեն բաժանված համեմատաբար նորագույն պատմության շրջանում։
«Եթե լինեինք մեկ ազգ, ապա Մոսկվայում, ամենայն հավանականությամբ, գրիվեն կշրջանառվեր, իսկ Պետդումայի վերևում դեղնաերկնագույն դրոշ կծածանվեր։ Այնպես որ՝ հաստատ մեկ ազգ չենք։ Մեզանից յուրաքանչյուրն իր ճանապարհն ունի»,- հայտարարել էր Զելենսկին։
Տաթև Ֆռանգյան
