Գործն է անմահ, լա՛վ իմացեք. Վահե Էնֆիաջյանը քառատողով դիմեց նոր խորհրդարանի պատգամավորներին. ՏԵՍԱՆՅՈՒԹ

Այսօր 7-րդ գումարման ԱԺ-ի վերջին նիստն էր ու ԱԺ փոխխոսնակ, ԲՀԿ պատգամավոր Վահե Էնֆիաջյանը հրաժեշտի ելույթ ունեցավ՝ հաշվետվություն ներկայացնելով, թե ինչ է արել ինքը խորհրդարանում:

«Անձամբ ես 8-րդ գումարման ԱԺ-ի ընտրություններին չեմ մասնակցել: Կարծում եմ, որ մենք պետք է ունենանք մշակույթ և վերաբերմունք մեր աշխատանքին, ներկային և հետագային՝ տեսլականի մասով: Ոնց որ մենք մուտք գործելով ԱԺ՝ որպես պատգամավորներ, երդմնակալության արարողություն ենք անցնում, նաև կարծում եմ, որ ճիշտ է խմբակցությունները ներկայացնեն իրենց անցած ուղին ու պատգամավորները առանձնապես հաշվետվողականությամբ հանդես գան:

Իմ համախոհների ու համակիրների կողմից, տեսնում եմ, որ այս պահանջարկը կա, ուզում եմ մի քանի վիճակագրական թվեր ներկայացնել:

Այս խորհրդարանական գործունեության ընթացքում իմ կողմից գրություններ ու հարցումներ են ուղարկվել 1200, որից 75%-ը դրական լուծում են ստացել: 300-ից ավելի գրություններ են ուղարկվել միջազգային կառույցներ, միջխորհրդարանական վեհաժողովներ, տարբեր լսումներ են կազմակերպվել խորհրդարանում, հարցազրույցներ: «Բաց դաս» ծրագրի շրջանակում 51 հանդիպում ենք ունեցել բուհերի և դպրոցների ներկայացուցիչների հետ, ունեցել եմ շուրջ 50 օրենսդրական նախաձեռնություններ, հանդիսացել եմ և հեղինակ, և համահեղինակ»:

Էնֆիաջյանն ասաց, որ մի շարք նախագծեր էլ ունի, որ դեռ չի հասցրել շրջանառության մեջ դնել, 8-րդ գումարման ԱԺ-ում կտեսնի՝ որ պատգամավորի հետ կհամագործակցի ու դրանք օրենք կդարձնի:

Վահե Էնֆիաջյանը շնորհակալություն հայտնեց իրեն երբևէ քվե տված քաղաքացիներին ու երախտիքի խոսք հայտնեց ԲՀԿ նախագահ Գագիկ Ծառուկյանին:

Ամփոփելով ելույթը՝ Էնֆիաջյանը մեջբերեց Թումանյանի ստեղծագործությունից. «Գործն է անմահ, լավ իմացեք, որ խոսվում է դարեդար, երնեկ նրան, ով իր գործով կապրի անվերջ, անդադար»:

Մանրամասները՝ տեսանյութում: