09.06.2026 | 17:19
«Ակրոնը» հրաժեշտ է տվել Էդգար Սևիկյանին
Հանկարծակի մահվան հարյուրավոր դեպքեր․ ինչի հետ է կապված աշխարհում անոմալ շոգը․ DW
Քաղաքականություն
01.07.2021 | 14:57
Կանադայում արտակարգ շոգը հանգեցրել է հարյուրավոր մահվան դեպքերի։ Միայն Բրիտանական Կոլումբիա նահանգում վերջին շաբաթվա ընթացքում գրանցվել է հանկարծակի մահվան 486 դեպք, ինչը կարող է լինել շոգի արդյունք: DW-ի ռուսական ծառայության հաղորդմամբ՝ այս մասին հայտնել են տեղի դատաբժիշկները։
Սա 195 տոկոսով ավելին է, քան տարվա այս ժամանակահատվածի սովորական ցուցանիշները: Նման հաղորդումներ են ստացվել նաև Կանադայի հյուսիս-արևմտյան շրջաններից։
«Վանկուվերում երբեք նման շոգ չի եղել և, ցավոք, տասնյակ մարդիկ դրանից մահանում են»,- հայտնել են Վանկուվերի ոստիկանությունից։
Լիտոն քաղաքում տեղի ժամանակով 16։20-ի սահմաններում օդի ջերմաստիճանը հասել է 49,5-ի։
Իսկ ԱՄՆ Օրեգոն և Վաշինգտոն նահանգների Փորթլենդ ու Սիեթլ քաղաքներում գրանցվել է 1940 թվականից հետո ամենաբարձր ջերմաստիճանը։ Որոշ բնակիչներ փորձում են թաքնվել շոգից ստորգետնյա ավտոտնակներում և նույնիսկ օդորակիչ ունեցող ավտոմեքենաներում: Արտակարգ շոգ պատճառով Օրեգոնում 60-ից ավելի բնակիչ մահացել է, ավելի քան 10-ն էլ՝ Վաշինգտոնում:
Օդերևութաբանները եղանակային անոմալիան կապում են, այսպես կոչված, «ջերմային գմբեթի» ազդեցության հետ, որն առաջացել է բարձր մթնոլորտային ճնշման պատճառով: Washington Post-ի տված հարցազրույցում փորձագետներից մեկն ասել է, որ ներկայիս բնական ֆենոմենը ծայրաստիճան ինտենսիվ է, և համադրելի երևույթները գրանցվում են «միջինում միայն մի քանի հազար տարին մեկ անգամ»: Այնուամենայնիվ, ըստ նրա, կլիմայի մարդածին փոփոխություններն «ավելի հավանական են դարձնում այս տեսակի անսովոր դեպքերը»:
Տաթև Ֆռանգյան
