11.10.2026 | 19:47
Կապանում ավտոմեքենան ընկել է Ողջի գետը
Բաքուն շարունակում է ՀՀ տարածքում խոցված ռուսական Մի-24 ուղղաթիռի խոցման հետաքննությունը
Քաղաքականություն
29.06.2021 | 17:38
Ադրբեջանը փաստեր է հավաքել ու փորձաքննություններ իրականացրել ռուսական Մի-24-ի խոցման հետ կապված՝ Լեռնային Ղարաբաղում էսկալացիայի սրման ժամանակ։ Աղետի հետաքննությունը շարունակվում է։ Այս մասին ՌԻԱ Նովոստիին հայտնել է Ադրբեջանի Գլխավոր դատախազության մամուլի ծառայության ղեկավար Գյունայ Սալիմզադեն։
«2020 թվականի նոյեմբերի 9-ին հայ-ադրբեջանական սահմանին՝ նախիջևանյան հատվածում, ՌԴ-ին պատկանող ռազմական Մի-24 ուղղաթիռի խոցման հետ կապված Գլխավոր դատախազությունը քրեական գործ է հարուցել անհապաղ ստուգումից հետո։ Անցկացվել են համապատասխան փորձաքննություններ, հավաքվել են իրեղեն ապացույցներ, ինչպես նաև իրականացվել են անհրաժեշտ այլ գործողություններ»,- ասել են մամուլի ծառայությունից։
Սալիմզադեն նաև ընդգծել է, որ Ադրբեջանի Գլխավոր դատախազությունն ապահովելու է ռուսական ուղղաթիռի գործով օրինական որոշման ընդունումը։
«Ներկայում հետաքննությունը շարունակվում է, փորձաքննությունների արդյունքներին համապատասխան՝ կապահովվի իրավական որոշման ընդունումը»,- ասել է Գյունայ Սալիմզադեն։
Հիշեցնենք՝ 2020թ․ նոյեմբերի 9-ին ՌԴ ՊՆ-ն հայտարարել էր, որ ռուսական Մի-24 ուղղաթիռ է խոցվել Հայաստանի օդային տարածքում՝ ԼՂ-ում ռազմական գործողությունների գոտուց դուրս։ Զոհվել էր անձնակազմի 2 անդամ, մեկը՝ ծանր վիրավորում ստացել։ Ադրբեջանական կողմը հայտարարեց, որ, իբր, պատահաբար է խոցել ռուսական ուղղաթիռն ու ներողություն խնդրեց։
Էմմա Չոբանյան
