Իսրայելում հայտնաբերել են հնագույն մարդկանց նոր տեսակի մնացորդներ

Իսրայելում հայտնաբերվել են հնագույն մարդկանց՝ նախկինում անհայտ տեսակի   մնացորդներ։ Մարդկային գանգի ու ծնոտի մնացորդները 120-140․000 տարեկան են, գիտնականները դրանք գտել են Իսրայելի կենտրոնում՝ Նեշեր-Ռամլայում պեղումների ժամանակ, հաղորդում է Euronews-ը։

Մանրամասն ուսումնասիրելով մնացորդները՝ հնէաբանները հայտնաբերել են ինչպես նեանդերտալացիներին (նախամարդ), այնպես էլ Homo ցեղից ծագած առաջին մարդուն, որը մոտ 2 մլն տարի առաջ է լքել Աֆրիկան, բնորոշ հատկություններ։

«Նայելով այդ ոսկորներին՝ մենք միանգամից հասկացանք, որ սա մարդու այլ տիպ է, ոչ թե Homo sapiens։ Գանգի մնացորդը ցույց է տալիս շատ ցածր ու հարթ գանգի, որը նման չէ մեր կլոր ու բարձր գանգին, իսկ ներքին ծնոտը կզակ չունի։ Իսկ կզակը, ինչպես գիտենք, ունենք միայն մենք՝ Homo sapiens տեսակի ներկայացուցիչները։ Դրա համար մենք միանգամից հասկացանք, որ գործ ունենք ինչ-որ այլ բանի հետ»,- ասել է Սաքլերի բժշկական ֆակուլտետի գիտաշխատող Հիլա Մեյը։

Չնայած արտաքին նմանությանը՝ ժամանակակից մարդիկ և նախամարդիկ զարգացել են տարբեր եղանակներով։ Նախկինում համարվում էր, որ երկու տեսակների նախնիները բաժանվել են մոտ 650․000 տարի առաջ։

Homo sapiens-ը մնացել է ապրելու Աֆրիկայում և աստիճանաբար գաղութացրել այն, իսկ Homo neanderthalensis-ը գաղթել է հյուսիս ու բնակեցրել Եվրոպան և Ասիան։ Գիտնականները նշում են, որ Իսրայելում հայտնաբերված մնացորդները նոր լույս կսփռեն մարդու էվոլյուցիայի վրա:

Էմմա Չոբանյան