29.04.2024 | 23:31
Վանաձորի մի շարք հասցեներում գազանջատումներ կլինեն
Բաքվում մեկնարկել է շիրակցի ևս 13 ռազմագերիների շինծու քրեական գործով դատավարությունը․ ԼՈՒՍԱՆԿԱՐՆԵՐ
Քաղաքականություն
22.06.2021 | 13:43
Բաքվի ծանր հանցագործությունների դատարանում մեկնարկել է շիրակցի ևս 13 ռազմագերիների նկատմամբ հարուցված շինծու քրեական գործով նախապատրաստական դատական նիստը։ Ադրբեջանը հայ ռազմագերիներին մեղադրում է ահաբեկչություն, դիվերսիա ու այլ հանցագործությունների կատարման մեջ։
Տեղական լրատվամիջոցների հաղորդմամբ՝ նիստն ընթանում է դատավոր Էլդար Իսմայիլովի նախագահությամբ։ Ճշտվում են հայ ռազմագերիների անձնական տվյալները։
13 հայ ռազմագերիներն են՝ Հայկազ Հովհաննիսյանը, Վարազդատ Մանուկյանը, Դավիթ Ստեփանյանը, Լևոն Թոսունյանը, Արթուր Բաղդասարյանը, Սերոբ Ավագյանը, Վարազդատ Հարությունյանը, Ժորա Մանուկյանը, Հրայր Հերաբյանը, Նարեկ Գասպարյանը, Գրիգոր Կյուրեղյանը, Աշոտ Գևորգյանը, Մարտին Աղրամանյանը։
Հիշեցնենք՝ 14 շիրակցի ռազմագերիների դատավարությունը տեղի է ունեցել հունիսի 16-ին, հունիսի 21-ին՝ ևս 13-ինը։
Բաքուն նախ շինծու քրեական գործ էր հարուցել 14 շիրակցի գերիների, ապա՝ ևս 13-ի նկատմամբ։ Այնուհետև Ադրբեջանի Պետանվտանգության ծառայությունն ու Գլխավոր դատախազությունը հայտարարեցին, որ ևս 26 շիրակցի ռազմագերիների դեմ հարուցված քրեական գործերի նախաքննությունն ավարտել ու գործերն ուղարկել են դատարան։
Հավելենք, որ Հադրութի Հին Թաղեր ու Խծաբերդ բնակավայրերում դեկտեմբերին, ռազմական գործողությունների ավարտից հետո, Շիրակի մարզի տարբեր համայնքներից 62 զինծառայողներ գերեվարվեցին Ադրբեջանի կողմից։ Նրանց նկատմամբ Ադրբեջանի իշխանությունները տարբեր քրեական գործեր են հարուցել, որակել են դիվերսանտներ ու հրաժարվում են վերադարձնել։ 9 շիրակցիներ արդեն վերադարձել են․ հունվարի 28-ին Հայաստան վերադարձավ 5 շիրակցի գերի, փետրվարի 8-ին՝ ևս 5 գերի, որոնցից 3-ը՝ Գյումրիից։ Եվս մի խումբ՝ 3 ռազմագերի, Հայաստան վերադարձավ մայիսի 4-ին․ նրանցից մեկը Շիրակի մարզից է։ Հունիսի 12-ին էլ Ադրբեջանը Հայաստանին վերադարձրեց 15 ռազմագերու, որոնց մեջ շիրակցիներ չկային։
Էմմա Չոբանյան
