Պուտին-Բայդեն հանդիպման մեջ ամենաարժեքավորն այն անցկացնելու փաստն էր․ միջազգային մամուլը՝ ժնևյան բանակցությունների մասին

Ժնևում նախօրեին կայացել է ՌԴ և ԱՄՆ նախագահներ Վլադիմիր Պուտինի և Ջո Բայդենի հանդիպումը։ Երկու երկրների ղեկավարներն էլ հայտարարել են, որ միանգամայն գոհ են արդյունքներից։ Հանդիպմանը համակ ուշադրությամբ հետևող միջազգային մամուլը, սակայն, կարծում է, որ այդ հանդիպման մեջ ամենաարժեքավորը, թերևս, այն անցկացնելու փաստն էր, քանի որ, ըստ էության, կողմերը միայն գծել են թույլատրելիի ու անթույլատրելիի սահմանները։

ՌԴ նախագահի խոսնակ Դմիտրի Պեսկովը հայտարարել է, որ բանակցություններն անցել են «մոտավորապես այնպես, ինչպես և ակնկալում էր ռուսական կողմը», իսկ Սպիտակ տան ներկայացուցիչը հայտնել է, որ Բայդենի ու Պուտինի միջև չի եղել առճակատում։

Հանդիպման մասին կարծիք է հայտնել նաև ԱՄՆ նախկին նախագահ Դոնալդ Թրամփը, որը Պուտինի հետ նման հանդիպում է ունեցել 2018 թվականին։ Նա ասել է, որ Վաշինգտոնը ոչինչ չստացավ Ժնևի գագաթնաժողովից, իսկ Ռուսաստանը՝ հակառակը, հաղթող դուրս եկավ։

New York Times-ը գրում է․ «Ների՛ր, Բայդեն, սակայն Պուտինը թքած ունի»։ «Ինչ էլ որ Բայդենն ասի, ինչ պատժամիջոցներ էլ, կիրառի, Պուտինը գիտի, որ Ռուսաստանում իր դիրքերն անսասան են, իսկ իր հեղինակությունը երկրի ներսում միայն աճում է ընդդիմության հանդեպ վերջին հարձակումներից հետո»,- նշում է պարբերականը։

Հանդիպման վերաբերյալ NYT-ը իր մեկ այլ հոդվածում գրում է, որ նախաձեռնելով հանդիպումը՝ Բայդենը սեփական նպատակներն էր հետապնդում և միանգամայն գոհ էր արդյունքներից։

«Ես արեցի այն, հանուն ինչի եկել էի»,- ամերիկացի նախագահի խոսքերն է մեջբերում պարբերականը և մեկնաբանում նրա վարքագիծը։

Բոլոր դիվանագիտական արձանագրությունները պահպանվել են․ հնչել են ճիշտ խոսքեր փոխադարձ շահերի ու համագործակցության մասին, սակայն երբ խոսք է գնացել փոխադարձ մեղադրանքների մասին, Բայդենը մեկ քայլ առաջ է գնել և բացեիբաց նախազգուշացրել Պուտինին՝ ցանկացած գործողության դեմ կլինի հակագործողություն։

Հանդիպումից հետո կայացած մամլո ասուլիսի ժամանակ ԱՄՆ նախագահը պարզաբանել է, որ, իհարկե, անմիջական սպառնալիքներ չեն եղել, սակայն Պուտինն այլևս կասկած չունի, որ ԱՄՆ-ը պատրաստակամ է անբարյացակամ քայլերին, մասնավորապես՝ կիբերհարձակումներին կամ այլ երկրների ընտրություններին միջամտելուն հզոր պատասխան տալ:

Բրիտանական Guardian-ն էլ ուշադրություն է հրավիրում այն հանգամանքին, թե ինչպես է Պուտինին հաջողվում Արևմուտքի հետ երկխոսել՝ չնայած Ուկրաինա ներխուժմանը, Ալեքսեյ Նավալնիին «Նովիչոկով» թունավորելուն, նրան հետապնդելուն, ամերիկյան ընտրություններին միջամտելուն և Ալեքսանդր Լուկաշենկոյին աջակցելուն։

«Եվ անգամ նման փնջի պարագայում, ըստ ամենայնի, ռուս ղեկավարն իրեն դեռևս ձիու վրա է զգում․ իրեն ավելի հանգիստ է պահել, քան իր զրուցակիցը, Տոլստոյ է մեջբերել, անգամ իրեն թույլ է տվել արհամարհել իր համար ոչ ցանկալի թեմաները։ Օրինակ՝ ՆԱՏՕ-ին Ուկրաինային հնավարավոր անդամակցությանը պարզապես ասել է, որ մտադիր չէ այն քննարկել։ Մինչդեռ Ջո Բայդենն անընդհատ զգոն էր», նշում է Guardian-ը: Նա ոչ մի դեպքում չէր կարող թույլ տալ Հելսինկիում 2018-ի կրկնությունը, երբ «Պուտինը Դոնալդ Թրամփին մատների վրա խաղացրեց այնպես, ինչպես ուզում էր»:

Ի տարբերություն արևմտյան մամուլի՝ ռուսական մամուլում հիմնականում խուսափում են մեկնաբանել ենթատեքստերն ու ըստ էության ամփոփել հանդիպումը։

«Կոմերսանտի» լրագրող Անդրեյ Կոլեսնիկովը, որը Ժնև էր մեկնել ՌԴ նախագահի հետ, կարծում է, որ Պուտինը Բայդենի հետ հանդիպումը սրտին մոտ է ընդունել, չնայած անմիջապես չի խոստովանել։

Կոլեսնիկովն իր եզրակացություններն անում է հիմնականում այն բանի հիման վրա, թե գագաթնաժողովից հետո ինչպես է ՌԴ նախագահը մանրակրկիտ և սրտացավ պատասխանել լրագրողների հարցերին: Հատկապես այն հարցերին, որոնք վերաբերում էին անձամբ իրեն: