Ուկրաինայի օդային տարածքի պաշտպանության համար գերժամանակակից ԱԹՍ է ստեղծվել

Կիևում տեղի ունեցած «Սպառազինություն և անվտանգություն-2021» ցուցահանդեսում ներկայացվել է նոր՝ ACE ONE ուկրաինական մարտական անօդաչու թռչող սարք, գրում է korrespondent-ը։

«Նման անօդաչու դեռևս չի եղել ո՛չ Ուկրաինայում, ո՛չ ամբողջ աշխարհում։ Մինչև 1 տոննա սպառազինություն տեղափոխող մարտական անօդաչուների դասում ACE ONE-ը համար մեկն է։ Այն մշակված է նորագույն տեխնոլոգիաների՝ Stealth-ի հիմքում։ Դրա, ինչպես նաև թևի հարթ ձևի շնորհիվ, անօդաչու սարքը գործնականում անտեսանելի է ռադարների համար և դժվար է բացահայտել դրա գտվելու վայրը։ ACE ONE-ի արագությունը մոտ է գերձայնայինին, այն է՝ 1000 կմ/ժ։ Կառավարումն իրականացվում է արհեստական ինտելեկտի համակարգի միջոցով, որը կարող է կառավարել նման անօդաչու թռչող սարքերի մի ամբողջ երամ»,- պատմել է նախագծի հեղինակներից Ալեքսանդր Լոսը:

Նախագծի համաղեկավարներից Վլադիմիր Ուսովը նշել է, որ անօդաչուն նախատեսված է Ուկրաինայի օդային տարածքի պաշտպանության համար։

«Եթե, օրինակ, Ուկրաինայի տարածք է մուտք գործում ԱԹՍ, ACE ONE-ը, որը զգալիորեն ավելի արագ է և ավելի հզոր իր բնութագրերով, մոտենում և ոչնչացնում է ԱԹՍ-ն։ ACE ONE-ը նաև օգտագործվում է հակառակորդի տարածք արագ ներխուժման, օպերացիայի իրականացման ու ցամաքային կայան հետ վերադառնալու համար»,- պարզաբանել է Ուսովը։

Նշվում է, որ ԱԹՍ-ի ստեղծման ուղղությամբ աշխատել են 25 ուկրաինացի գիտնականներ և օդատիեզերականության ոլորտի մասնագետներ։

Տաթև Ֆռանգյան