Երևանի քաղաքապետարանի հանրակրթության վարչության պետ է նշանակվել ընտրություններում կեղծ դիտորդը

Երևանի քաղաքապետ Տարոն Մարգարյանի որոշմամբ Երևանի քաղաքապետարանի աշխատակազմի հանրակրթության վարչության պետ է նշանակվել Սիամանթոյի անվան թիվ 162 հիմնական դպրոցի տնօրեն Աննա Ստեփանյանը, որը, ըստ «Իրազեկ քաղաքացիների միավորում» ՀԿ-ի, կեղծ դիտորդ է եղել Երևանի ավագանու ընտրությունների ժամանակ։ ՀՀԿ խոսնակ Էդուարդ Շարմազանովը չի ուզում մեկնաբանել Տարոն Մարգարյանի որոշումը:

«Քաղաքապետարանում կադրային տեղաշարժերը, նշանակումները չեմ մեկնաբանում, դա իմ գործառույթը չէ, Երևանի քաղաքապետն ընտրված անձնավորություն է, և օրենքով սահմանված կարգով նշանակում է, ազատում է, վերանշանակում է իր աշխատակազմի ներկայացուցիչներին»,-Factor.am-ի հետ զրույցում ասաց ՀՀԿ խոսնակը։

«Իրազեկ քաղաքացիների միավորում» ՀԿ նախագահ Դանիել Իոաննիսյանը հիշեցնում է, որ Աննա Ստեփանյանը Երևանի ավագանու ընտրությունների ժամանակ չհավատարմագրված դիտորդ է եղել Մալաթիա-Սեբաստիա համայքնում: «Երևի մատուցած ծառայությունների համար իրեն պարգևատրում են, ընդհանրապես լավ կլինի, որ Տարոն Մարգարյանը «Ընտրակեղծարարության համար առաջին աստիճանի, «Հանրապետական կուսակցությանը մատուցած ծառայությունների համար երրորդ աստիճանի» և այդպես շարունակ մեդալներով պարգևատրի այն մարդկանց, որոնք ապօրինի ծառայություններ են մատուցում կուսակցությանը»,- ասաց Իոաննիսյանը։

«Սա խայտառակություն է, որ մայրաքաղաքի հանրակրթության վարչության պետը կեղծ դիտորդ է լինում»,- եզրափակեց նա։

Հիշեցնենք, որ երեկ՝ հունիսի 5-ին, Տարոն Մարգարյանի որոշմամբ Երևանի քաղաքապետարանի հանրակրթության վարչության պետի պաշտոնից ազատվել է ՎՊ նախկին նախագահի կինը՝ Գայանե Սողոմոնյանը։

Սեդա Ղուկասյան