15.12.2025 | 11:22
Ծիծեռնակաբերդի խճուղու հիմնական փլուզված հատվածը վերականգնվել է․ քաղաքապետարանի պաշտոնյա. ՏԵՍԱՆՅՈՒԹ
Էրդողանը Շուշիում խոսել է Հայաստանի հետ հարաբերությունների բարելավման և Հարավային Կովկասում խաղաղության ապահովման մասին
Քաղաքականություն
15.06.2021 | 19:45
Այսօր Արցախի օկուպացված Շուշի քաղաքում տեղի ունեցած մամուլի ասուլիսում Թուրքիայի նախագահ Ռեջեփ Թայիփ Էրդողանը հայտարարել է, որ «6-ի ձևաչափը» կարող է Հարավային Կովկասի տարածաշրջանում խաղաղություն ապահովել։
«6-ի պլատֆորմի օգնությամբ, որում ենթադրվում է ընդգրկել Ադրբեջանին, Թուրքիային, Ռուսաստանին, Վրաստանին, Հայաստանին ու Իրանին, մենք ցանկանում ենք, որ այս տարածաշրջանը դառնա խաղաղության տարածաշրջան»,- ասել է Էրդողանը Ադրբեջանի նախագահ Իլհամ Ալիևի հետ համատեղ ասուլիսում։
Նա նաև հայտարարել է, թե այդ ուղղությամբ աշխատում է իր ադրբեջանցի գործընկերոջ հետ և պատրաստ է բոլոր անհրաժեշտ ջանքերը գործադրել։
«Նմանատիպ ջանքներ պատրաստ է գործադրել նաև Ռուսաստաի նախագահ Վլադիմիր Պուտինը, որ տարածաշրջանում խաղաղություն տիրի»,- ասել է նա։
Էրդողանը նաև նշել է, որ Անկարան իրենից կախված ամեն ինչ կանի՝ «Հայաստանի հետ հարաբերությունները կարգավորելու համար», և Երևանին կոչ է արել համագործակցել «6 ձևաչափում»։
«Ես կոչ եմ անում Երևանին՝ օգտվել տարածաշրջանում համագործակցության հնարավորությունից։ Մեզնից կախված ամեն ինչ կանենք՝ Հայաստանի հետ հարաբերությունների կարգավորման համար»,- ասել է Էրդողանը։
Նա նաև հայտնել է օկուպացված հայկական Շուշիում Թուրքիայի գլխավոր հյուպատոսություն բացելու ծրագրերի մասին։
«Ամենակարճ ժամանակում մենք Շուշիում գլխավոր հյուպատոսություն կբացենք»,-ասել է Էրդողանը՝ հավելելով, որ դա ավելի կամրապնդի Թուրքիայի ներկայությունը տարածաշրջանում։
Նշենք, որ այսօր Ադրբեջանի ու Թուրքիայի նախագահները երկու երկրների համագործակցության նոր դաշնակցային հռչակագիր են ստորագրել Շուշիում։
Էմմա Չոբանյան
