ՏԱՐԱԿԱՐԾԻՔ. «Հայֆիլմի» մասնավորեցումը կինոստուդիայի զարգացմա՞ն, թե՞ կործանման ճանապարհ

Ինչպես հայտնի է, Հայաստանի կառավարությունը հաստատել է 2017-2020 թվականների մասնավորեցման ծրագիրը, որով նախատեսվում է մասնավորեցնել 47 պետական ընկերություններ, 23-ը՝ սեփականաշնորհման նախկին ծրագրով: Դրանց թվում է նաև «Հայֆիլմ» կինոստուդիան:

Ընկերությունների վաճառքից պետությունն ակնկալում է ստանալ 35-36 միլիարդ դրամ: Դեռևս 12 տարի առաջ կինոստուդիան 350 մլն դրամով վաճառվել էր «Armenio Studios» ՓԲԸ-ին, որը ամերիկահայ գործարար Ջերարդ Գաֆեսճյանին և Բագրատ Սարգսյանին պատկանող «CS MEDIA CITY» հոլդինգի մի մասն էր։ Ընկերությունը պարտավորվել էր թվայնացնել ֆիլմերը և կինոստուդիայի հիմնանորոգում ու տեխնիկական վերազինում իրականացնել: Սակայն, ինչպես պարզվել էր, անցած տարիներին պայմանագրային պարտավորությունները չէին կատարվել: Արդեն 2015-ին «Հայֆիլմը» վերադարձվեց Հայաստանի Հանրապետությանը։ Եվ հիմա, երբ կինոստուդիան հանվում է վաճառքի, մասնավորեցման նախկին անհաջող փորձի ֆոնին դրա ճակատագիրը կրկին վտանգվում է։

Որպես հնարավոր սեփականատերեր՝ շրջանառվում են Հայաստանի Հանրային հեռուստառադիոընկերության խորհրդի նախագահ, «Շարմ Հոլդինգ» ընկերության հիմնադիր Ռուբեն Ջաղինյանի և Ռուսաստանի հայերի միության նախագահ Արա Աբրահամյանի անունները։ Դեռ հարց է՝ ով կսեփականաշնորհի ստուդիան, արդյոք սեփականատերը հոգ կտանի՞ «Հայֆիլմը» վերականգնելու, հայ կինոյի ավանդույթները պահպանելու մասին։

Մասնավորեցումը զարգացման ի՞նչ հեռանկարներ և ի՞նչ վտանգներ է պարունակում. դիտեք factor.am-ի  «Տարակարծիք» հաղորդաշարի հերթական թողարկման մեջ:

Աննա Բաբաջանյան