09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Հայաստանի և Իտալիայի հարաբերությունները կառուցված են դարերի ամուր հիմքերի վրա. նախագահին հավատարմագրերն է հանձնել ՀՀ-ում Իտալիայի դեսպանը
Քաղաքականություն
07.06.2021 | 17:43
Հանրապետության նախագահ Արմեն Սարգսյանին այսօր հավատարմագրերն է հանձնել Հայաստանի Հանրապետությունում Իտալիայի Հանրապետության նորանշանակ դեսպան Ալֆոնսո դի Ռիզոն:
Շնորհավորելով և հաջողություններ մաղթելով նորանշանակ դեսպանին՝ նախագահն ասել է, որ ակնկալում է համատեղ ակտիվ աշխատանք՝ ընդլայնելու և հարստացնելու երկկողմ համագործակցության օրակարգը:
Նախագահ Սարգսյանը նշել է, որ Հայաստանի և Իտալիայի հարաբերությունները կառուցված են դարերի ամուր հիմքերի վրա, երկու երկրներն ու ժողովուրդները նման են իրենց արժեհամակարգերով:
Դեսպան Ալֆոնսո դի Ռիզոն Հայաստանի նախագահին է փոխանցել Իտալիայի նախագահ Սերջիո Մատարելլայի ջերմ ողջույններն ու բարեմաղթանքները: Նա ասել է, որ պատրաստ է առավել մեծ ջանքեր ներդնել երկու երկրների ավանդական բարեկամական հարաբերությունները տարբեր ոլորտներում առաջ մղելու ուղղությամբ:
Կարևորելով նախագահ Արմեն Սարգսյանի՝ նախատեսվող պետական այցն Իտալիա, որը հետաձգվել էր կորոնավիրուսի համավարակի պատճառով, դեսպանը վստահություն է հայտնել, որ այն մեծ խթան ու նոր սկիզբ կհանդիսանա երկկողմ փոխգործակցության ընդլայնման համար:
Հայաստանի նախագահը և Իտալիայի դեսպանն անդրադարձել են հայ-իտալական հարաբերությունների ներկա մակարդակին և զարգացման ներուժին: Ընդգծվել են մասնավորապես առևտրատնտեսական, տեխնոլոգիական, գիտակրթական, մշակութային ոլորտներում համագործակցության մեծ հնարավորությունները:
