Թուրքական և ադրբեջանական աղբյուրները Արցախյան պատերազմում Բաքվի կորուստների տարբեր թվեր են ներկայացնում

Թուրքական TRT-ն ուշագրավ տեղեկություն է հրապարակել Արցախյան պատերազմում զոհված ու վիրավորված ադրբեջանցի զինծառայողների մասին։ Ըստ լրատվամիջոցի՝ պատերազմում, ընդհանուր առմամբ, 6․000 ադրբեջանցի է զոհվել և վիրավորվել։

Հրապարակումը, որտեղ խոսվում է այն մասին, որ Թուրքիան պատերազմում զոհվածների երեխաներին նվերներ է ուղարկում Ադրբեջան, ասվում է հետևյալը․ «Նվերներ կստանան 6․000 ադրբեջանցի զինծառայողների երեխաները, որոնք Ղարաբաղի «ազատագրման համար» զոհվել կամ վիրավորվել են 44-օրյա պատերազմի ընթացքում։ Մինչև հունիսի 20-ը նվերների քարավանը կայցելի 16 ադրբեջանական քաղաքներ»։

Թուրքական կողմի ներկայացրած այս թվերը չեն համընկնում Ադրբեջանի Պաշտպանության նախարարության հրապարակած պաշտոնական տվյալների հետ։ Մասնավորապես, նախօրեին ՊՆ-ի հրապարակած թարմացված տվյալներով՝ պատերազմում ռազմական գործողությունների հետևանքով զոհերի թիվը հասել է 2․900-ի։ Ավելի վաղ ՊՆ-ն հաղորդել էր 2․895 զոհի մասին։

«Ներկայում աշխատանքներ են տարվում անհետ կորած 14 զինծառայողի որոնման ուղղությամբ»,- ասվում էԱդրբեջանի ՊՆ հաղորդագրության մեջ։

Իսկ դեռ դեկտեմբերին հրապարակած պաշտոնական տվյալներով էլ՝ վիրավորները թիվը 1․245 է։ Ընդհանուր առմամբ, ադրբեջանական տվյալներով, ստացվում է 4․145 զոհ ու վիրավոր, որը հակասում է թուրքական լրատվամիջոցի հրապարակած տվյալին։

Հավելենք նաև, որ հայկական կողմի տվյալներով ու տարբեր փորձագետների կարծիքով՝ ադրբեջանական կողմի կորուստները մի քանի անգամ ավելին են պաշտոնապես թվերից, ինչն արդեն փաստում են նաև թուրքերը։

Էմմա Չոբանյան