«Մեր հույսը միայն Ռուսաստանն է»․ անհետ կորած զինծառայողների հարազատները դիմում են ՌԴ-ին․ ՏԵՍԱՆՅՈՒԹ

Անհետ կորած զինծառայողների հարազատներն այսօր բողոքի ակցիա են իրականացրել Հայաստանում ՌԴ դեսպանատան դիմաց։ Նրանց պահանջ-խնդրանքն է, որ Ռուսաստանի ռազմաքաղաքական ղեկավարությունը զբաղվի անհետ կորած զինծառայողների հարցով։

Հարազատները նշում են, որ իրենց միակ հույսը Ռուսաստանն է։

«Մեր ղեկավարությունը կորցրել է կոմպետենտությունը, այս պահին ոչ ոք ոչնչով չի զբաղվում։ Ես դիմում եմ Ռուսաստանի նախագահին, ԱԳ նախարարին, պաշտպանության նախարարին, չգիտեմ ինչպես, բայց հասեք նրան, որ Ադրբեջանը պաշտոնապես ճանաչի մեր գերիներին ու նրանց մեզ վերադարձնի»,- ասաց ակցիայի մասնակիցներից մեկը։

Արցախի արտակարգ իրավիճակների պետական ծառայության տնօրենի նախկին տեղակալ Բորիս Ավագյանն էլ հայտնեց, որ ՀՀ ԶՈՒ Գլխավոր շտաբի պետի տեղակալ Արշակ Կարապետյանին ուղարկել են Ռուսաստան՝ բանակցությունների, սակայն, ըստ Ավագյանի, նա չի կարողանում որևէ հարց լուծել։

«Նա՞ պետք է պաշտպանի մեր երեխաների շահերը, աբսուրդ է։ Նույն իրավիճակը սահմանի հետ է կապված։ Ես կարծում եմ, որ Ռուսաստան պետք էր ուղարկել գեներալ Մարտիկյանին, որը ռազմական հետախուզության ղեկավարն է, նա ավելի լավ կբանակցեր, քան Կարապետյանը։ Ուղարկել են մի անձնավորության, որր երկու շաբաթ գնում է բանակցելու, բայց մեր սահմանագծից զինծառայողների են գերեվարում։ ՊՆ-ից Մարտիկյանին և ԱԱԾ տնօրենին պետք է ուղարկեին»,- ասաց Ավագյանը։

Նա նաև նշեց, որ կան ծնողներ, որոնք հստակ տեղեկություններ ունեն իրենց տղաների գտնվելու վայրի մասին։

Արփի Հակոբյան