11.10.2026 | 14:46
Այսօր աղջիկ երեխաների միջազգային օրն է
Գերմանիան ներողություն է խնդրել Նամիբիայից ցեղասպանության համար և խոստացել է վճարել 1.3 միլիարդ դոլար
Քաղաքականություն
28.05.2021 | 18:58
Գերմանիան պաշտոնապես ներողություն է խնդրել 20-րդ դարի սկզբին կայսերական Գերմանիայի գաղութային զորքերի կողմից ժամանակակից Նամիբիայի տարածքում հերերո և նամա ցեղերի կոտորածների համար: Այդ ժամանակ սպանվել են այս ցեղերի տասնյակ հազարավոր ներկայացուցիչներ, գրում է BBC-ի ռուսական ծառայությունը:
«Հաշվի առնելով Գերմանիայի պատմական և բարոյական պատասխանատվությունը ՝ մենք Նամիբիայից և զոհերի սերունդներից ներում ենք խնդրում», – ասել է Գերմանիայի արտաքին գործերի նախարար Հայկո Մաասը:
Նախարարը նաև շեշտել է, որ այսուհետ Գերմանիան Նամիբիայում 1904-1908 թվականների կոտորածները պաշտոնապես կոչելու է ցեղասպանություն:
Որպես փոխհատուցում՝ Գերմանիան 1.3 միլիարդ դոլար կծախսի նամիբիացիներին և զոհերի ժառանգներին ֆինանսական աջակցություն ցուցաբերելու համար: Մաասը շեշտել է, որ այդ գումարը վճարվում է «զոհերին հասցված հսկայական տառապանքի» համար: Գումարը Գերմանիան վճարելու է 30 տարվա ընթացքում. միջոցները կուղղվեն Նամիբիայում գտնվող ենթակառուցվածքային ծրագրերին, երկրի բնակիչների առողջապահությանը, կրթությանը և վերապատրաստման տարբեր ծրագրերին:
Գերմանիան 2015-ին էր դեռևս ճանաչել ցեղասպանության փաստը, որից հետո Նամիբիայի հետ բանակցություններ են սկսվել ֆինանսական փոխհատուցման վերաբերյալ:
Այնուամենայնիվ, այս երկու ցեղերի մի շարք առաջնորդներ հրաժարվում են ճանաչել Նամիբիայի և Գերմանիայի միջև փոխհատուցման պայմանագրերը։
Տաթև Ֆռանգյան
