30.06.2026 | 11:35
ԱՄՆ-ի և Իրանի բանակցողները մեկնում են Դոհա, սակայն հանդիպումը հաստատված չէ
ԱՄՆ Հետաքննությունների դաշնային բյուրոն և Լեհաստանը հետաքննություն են սկսել Ryanair ինքնաթիռի հարկադիր վայրէջքի առնչությամբ
Քաղաքականություն
28.05.2021 | 19:07
ԱՄՆ Հետաքննությունների դաշնային բյուրոն (ՀԴԲ) և Լեհաստանը սկսել են իրենց սեփական հետաքննությունները Մինսկում Ryanair ինքնաթիռի հարկադիր վայրէջքի վերաբերյալ, որի հետևանքով բերման է ենթարկվել Բելառուսի հայտնի ընդդիմադիր գործիչ Ռոման Պրոտասևիչը։ Այս մասին հայտնել է Լիտվայի քրեական ոստիկանության պետ Ռոլանդաս Կիշկիսը մայիսի 28-ին, Վիլնյուսում կայացած մամուլի ասուլիսի ժամանակ, գրում է DW-ի ռուսական ծառայությունը։
«Լեհաստանի Հանրապետությունում սկսված հետաքննությանը զուգահեռ, մենք Միացյալ Նահանգների գործընկերներից տեղեկություններ ունենք, որ ՀԴԲ-ն սկսել է իր սեփական հետաքննությունը: Մենք նաև ինտենսիվ համագործակցում ենք Իռլանդիայի, Հունաստանի մեր գործընկերների հետ. Դա տեղի է ունենում ամեն օր, շուրջօրյա, շաբաթը յոթ օր», – լրագրողներին ասել է Կիշկիսը:
Նրա խոսքով ՝ հարցաքննվել են Ryanair ինքնաթիռի անձնակազմի անդամները, ինչպես նաև «օդանավի բոլոր ուղևորների շուրջ 90% -ը»:
Հիշեցնենք՝ ի պատասխան Ryanair-ի ինքնաթիռի հարկադիր վայրէջքի, որը շատ երկրների քաղաքական գործիչներ անվանում են օդային ծովահենության ակտ, եվրոպական պետությունների մեծ մասը, ներառյալ Բելառուսի հարևանները ՝ Լեհաստանը, Լիտվան, Ուկրաինան և Լատվիան, փակել են իրենց օդային տարածքը բելառուսական ինքնաթիռների համար, բազմաթիվ ավիաընկերություններ էլ որոշել են շրջանցել Բելառուսը:
Եվրամիությունը նախատեսում է այդ սահմանափակումները ձևակերպել որպես պաշտոնական պատժամիջոցներ: Ալեքսանդր Լուկաշենկոն հավաստիացնում է, որ ինքնաթիռը վայրէջք է կատարել բացառապես օդանավում ռումբի մասին հաղորդագրության պատճառով, բայց Լուկաշենկոյի ռեժիմի բոլոր հակառակորդները միանգամայն համոզված են, որ ռումբի մասին հաղորդագրությունը դիտավորյալ է տարածվել, և ինքնաթիռին հարկադրել են վայրէջք կատարել՝ Պրոտասևիչին ձերբակալելու համար:
