14.09.2026 | 21:13
Oգոստոսի կլիմայական պայմանները Հայաստանում
Պուտինը՝ Ալիևին․ «Համատեղ ջանքերով ամրապնդելու ենք մեր ռազմավարական գործընկերությունը»
Քաղաքականություն
27.05.2021 | 13:28
ՌԴ նախագահ Վլադիմիր Պուտինը շնորհավորել է ադրբեջանցի գործընկերոջը՝ Իլհամ Ալիևին երկրի ազգային տոնի՝ Հանրապետության օրվա առթիվ, որը նշվում է մայիսի 28-ին։ Այս մասին հաղորդում է ՏԱՍՍ-ը՝ վկայակոչելով Ադրբեջանի նախագահի պաշտոնական կայքում հրապարակված շնորհավորական նամակը։
Պուտինը շնորհավորական ուղերձում վստահություն է հայտնել, որ երկու երկրների ռազմավարական գործընկերությունը հետագայում ավելի կամրապնդվի։
«Ընդունեք իմ ամենաջերմ շնորհավորանքները ազգային տոնի՝ Հանրապետության օրվա առթիվ։ Ադրբեջանը հաջողությունների է հասել սոցիալ-տնտեսական, գիտատեխնիկական ու այլ ոլորտներում։ Ձեր երկիրը նշանակալի հեղինակություն ունի միջազգային ասպարեզում, ակտիվ դերակատարում ունի միջազգային օրակարգի շատ կարևոր հարցերի լուծման գործում»,- ասվում է շնորհավորական նամակում։
Ըստ աղբյուրի՝ ՌԴ նախագահը նաև նշել է, որ Ռուսաստանը բարձր է գնահատում Ադրբեջանի հետ հարաբերությունները, որոնք հիմնված են «ընկերության ու փոխադարձ հարգանքի բարի ավանդույթների վրա»։
«Համոզված եմ, որ համատեղ ջանքերով մենք հետագայում էլ ամրապնդելու ենք մեր ռազմավարական գործընկերությունը, արդյունավետ համագործակցությունը բոլոր ոլորտներում՝ ի շահ մեր ժողովուրդների, տարածաշրջանային անվտանգության ու կայունության ապահովման համար»,- ասվում է նամակում։
Էմմա Չոբանյան
