18.12.2025 | 23:24
ՀՀ տարածքում ավտոճանապարհները հիմնականում անցանելի են
Ադրբեջանի ԱԳՆ-ն Հայաստանին մեղադրել է «սադրիչ ահաբեկչական գործողության փորձի» մեջ
Քաղաքականություն
27.05.2021 | 12:33
Ադրբեջանի ԱԳՆ-ն հայտարարություն է տարածել ՀՀ տարածքում ադրբեջանական ուժերի կողմից 6 հայ զինծառայողի գերեվարման մասին։
Դրանում, մասնավորապես, Ադրբեջանի արտաքին քաղաքական գերատեսչությունը «սադրիչ ահաբեկչական գործողություն է որակել» հայ զինծառայողների իրականացրած գործողությունները ՀՀ տարածքում՝ համարելով ներխուժում իրենց երկրի տարածք։
«Հայաստանի ԶՈՒ-ի հետախուզական ուժերի ներթափանցումն Ադրբեջանի տարածք, նրանց կողմից փորձերը՝ ականապատելու այդ տարածքներն ու հետախուզական գործողությունների իրականացումը մեր կողմից դիտարկվում որպես սադրիչ ահաբեկչական գործողությունների փորձ»,- ասվում է հայտարարության մեջ։
Նշվում է նաև, որ, իբր, մի քանի խումբ դիվերսանտներ փորձել են հատել Ադրբեջանի սահմանը։
«Այդ խմբերը հայտնաբերվել են։ Խմբերից մեկից զինաթափվել ու գերի են վերցվել 2 հայ դիվերսանտներ, մյուս խմբից՝4-ը։ Մյուս մասին հաջողվել է փախչել»,- ասվում է ադրբեջանական կողմի հայտարարության մեջ։
Միևնույն ժամանակ, Ադրբեջանի ԱԳՆ-ն նշել է, թե Բաքուն ցանկանում է բանակցությունների միջոցով սահմանազատում իրականացնել Հայաստանի հետ։
«Ադրբեջանի սահմանների խախտման փորձերն անընդունելի են։ Հայաստանը պետք է զերծ մնա գործողություններից, որոնք ուղղված են երկու երկրների սահմանին լարվածության ավելացմանը և հարգի հարևան պետության սահմանները։ Ադրբեջանը սատարում է հայ-ադրբեջանական պետական սահմանին լարվածության կարգավորումը բանակցությունների միջոցով և աջակցում միջազգային հանրության կոչերին՝ երկու երկրների միջև սահմանների դելիմիտացիային ու դեմարկացիային»,- ասվում է հայտարարության մեջ։
Հիշեցնենք, որ այսօր վաղ առավոտյան Հայաստանի Գեղարքունիքի մարզի սահմանային հատվածում, ՀՀ ԶՈՒ N զորամասի պահպանության տարածքում ինժեներական աշխատանքներ կատարելիս, ադրբեջանական զինված ուժերի զինծառայողների կողմից շրջափակվել և գերեվարվել է ՀՀ ԶՈՒ վեց զինծառայող։
Էմմա Չոբանյան
