21.12.2025 | 13:04
24-ժամյա վթարային ջրանջատում Երևանում և Կոտայքում
Չեմ կարծում՝ ապագա համաներումները ընտրակաշառքի հոդվածի վրա ազդելու են․ խորհուրդ չեմ տա․ Փաշինյան. ՏԵՍԱՆՅՈՒԹ
Քաղաքականություն
26.05.2021 | 18:04
Հայաստանում խորհրդարանական ընտրություններին ընդառաջ հնարավոր ընտրակաշառք բաժանելու հարցով արդեն կա երեք օպերատիվ գործ, իրականացվում են օպերատիվ միջոցառումներ: Այս մասին հայտնեց ՀՀ վարչապետի պաշտոնակատար Նիկոլ Փաշինյանը՝ ԱԺ-ում կառավարության անդամների հետ հարց ու պատասխանի ժամանակ՝ անդրադառնալով ԼՀԿ պատգամավոր Սարգիս Ալեքսանյանի դիտարկմանը, թե լուրեր են տարածվում ընտրակաշառքի բաժանման վերաբերյալ:
Փաշինյանը նկատեց, որ պատգամավորը մոռացավ նշել մի կարևոր նրբություն, որ խոսքը չի գնում այն մասին, որ իշխանությունների կողմից է դա արվում: «Խիստ կասկածում եմ, որ ՀՀ-ում լուր կա, որ գործող իշխանությունը կամ իշխող կուսակցությունը ընտրակաշառքների հետ կապված ինչ-որ բան է անում: Լուրեր տարածվում են ձեզ և մեզ հայտնի շրջանակների հետ կապված: Այդ լուրերի մասին տեղյակ են իրավապահ մարմինները:
«Բոլոր այն մարդկանց, որոնք հույս ունեն վերականգնելու հին ավանդույթները, խորհուրդ չեմ տա, քանի որ չեմ կարծում, որ ապագա համաներումները ընտրակաշառքի գործերի վրա տարածվելու են: Ընտրակաշառքի մասին խոստումն արդեն քրեական հանցագործություն է և ծանր պատասխանատվություն է ենթադրում:
Ինձ զեկուցել են, որ արդեն կա 3 օպերատիվ գործ՝ մի քանի ուղղություններով, որոնց անձանց շրջանակը պարզված է, նրանց նկատմամբ օպերատիվ միջոցառումներ են իրականացվում, որոնց մասին նրանք չեն կռահում: Կարող եք հանգիստ լինել, որ անհրաժեշտ միջոցառումները կձեռնարկվեն»,- վստահեցրեց Փաշինյանը:
Նրա խոսքով՝ շատ կարևոր է, որ իշխանությունը և ընդդիմության մի հատվածը իրար չեն կասկածում ընտրակաշառք բաժանելու մեջ, ինչը, ըստ նրա, նշանակում է, որ այս հարցում իրենք համագործակցելու սահմանափակում չունեն:
Մանրամասները՝ տեսանյութում:
