Տիխանովսկայան հայտարարել է Բելառուսում բողոքի ցույցերի նոր փուլի մեկնարկի մասին

Բելառուսի նախագահի նախկին թեկնածու Սվետլանա Տիխանովսկայան հայտարարել է հանրապետությունում բողոքի ցույցերի նոր փուլի մեկնարկի մասին։ Այս մասին հայտարարությունը հրապարակվել է բելառուս ընդդիմադիր առաջնորդի Telegram-ալիքում։

Քաղաքական գործչի կարծիքով՝ Բելառուսի իշխանությունների գործողությունների պատճառով երկիրը հայտնվել է միջազգային իզոլացման եզրին ու քարտեզի վրա վերածվել է սև կետի, ինչը սպառնում է քաղաքացիների հանդեպ տեrորի նոր ալիքով։ «Այլևս ոչնչի սպասել պետք չի։ Ահաբեկչությունը պետք է կանգնեցնել մեկընդմիշտ։ Մենք սկսում ենք պատրաստվել ճնշման նոր ակտիվ փուլի»,- ասված է հայտարարության մեջ։

Տիխանովսկայան պարզաբանել է, որ նոր բողոքի ցույցերին նախապատրաստվելու շրջանակներում ընդդիմությունը մտադիր է ուժեղացնել միջազգային ճնշումը վարչակազմի վրա, ընդլայնել երկրի նախագահ Ալեքսանդր Լուկաշենկոյի շրջապատի ու տեղի չինովնիկների հետ շփումները , ինչպես նաև երկրի ներսում «զարգացնել պարտիզանական շարժման համակարգերը»։

«Մենք ՝ բելառուսներս, պետք է ամեն ինչ անենք քաղբանտարկյալներին ազատելու, բռնությունները դադարեցնելու և արդար ընտրություններ անցկացնելու համար: Մենք պետք է գործենք. հնարավորության պատուհանը բաց է », – ասել է ընդդիմադիր առաջնորդը:

Ավելի վաղ Տիխանովսկայան ասել էր, որ Եվրամիության արտաքին գործերի գերագույն ներկայացուցիչ Ջոզեպ Բորելը խոստացել է իրեն նոր պատժամիջոցներ կիրառել Մինսկի դեմ ՝ Ryanair –ի ինքնաթիռի հետ կապված միջադեպի պատճառով:

Հիշեցնենք՝ մայիսի 23-ին Աթենքից Վիլնյուս թռչող Ryanair ընկերության ինքնաթիռը հարկադիր վայրէջք էր կատարել Մինսկում։ Օդաչուներին տեղեկացրել էին օդանավում տեղադրված ռումբի մասին և նրանց խորհուրդ էին տվել վայրէջք կատարել Մինսկում։ Բելառուսը Միգ -29 կործանիչ էր բարձրացրել երկինք՝ ինքնաթիռն ուղեկցելու համար: Ինքնաթիռի վայրէջքից հետո բերման էր ենթարկվել ընդդիմադիր Ռոման Պրոտասևիչը՝ NEXTA-ի նախկին գլխավոր խմբագիրը։ Իսկ օդանավում ոչ մի ռումբ չէր հայտնաբերվել: Պրոտասևիչը, նրա ընկերուհին՝ Ռուսաստանի քաղաքացի Սոֆյա Սապեգան և մի քանի այլ անձինք չէին հասել Վիլնյուս:

Տաթև Ֆռանգան