17.09.2026 | 10:00
Ազգային ժողովի նիստը՝ ՈՒՂԻՂ
Գերմանիայում չեն բացառել Ռուսաստանի մասնակցությունը Մինսկում Ryanair-ի օդանավի հարկադիր վայրէջքին
Քաղաքականություն
26.05.2021 | 13:44
Չի բացառվում Ռուսաստանի մասնակցությունը Մինսկում Ryanair ավիաընկրության օդանավի հարկադիր վայրէջքին, որին հաջորդել էր բելառուս լրագրող Ռոման Պրոտասևիչի և նրա ընկերուհու ՝ Սոֆյա Սապիեգիի կալանքը, որոնք գտնվել են ինքնաթիռում: Նման կարծիք է հայտնել Բունդեսթագի արտաքին գործերի հանձնաժողովի նախագահ, Գերմանիայում իշխող Քրիստոնյա-դեմոկրատական միության ներկայացուցիչ Նորբերտ Ռյոտգենը, Rheinische Post- ին և General-Anzeiger- ին տված հարցազրույցում, գրում է DW-ի ռուսական ծառայությունը։
«Ենթադրելի է՝ ինքնաթիռի պետական առևանգումը առնվազն Կրեմլի հավանությանն է արժանացել կամ նույնիսկ ավելին՝ ՌԴ-ի կողմից օպերատիվ աջակցություն է ստացել», – ասել է քաղաքական գործիչը: Ըստ Ռյոտգենի՝ առանց Ռուսաստանի նախագահ Վլադիմիր Պուտինի լայնածավալ աջակցության Բելառուսի ղեկավար Ալեքսանդր Լուկաշենկոն վաղուց կկորցներ իշխանությունը:
Նորբերտ Ռյոտգենը կարծիք է հայտնել, որ Լուկաշենկոյի ռեժիմի դեմ պատժամիջոցները պետք է ուժեղացվեն: «Եկել է ժամանակը, որպեսզի կոշտ պատժամիջոցներ կիրառվեն Լուկաշենկայի ռեժիմի բոլոր հիմնասյուների դեմ ՝ զինվորականներ, ոստիկանություն, հատուկ ծառայություններ և բոլոր պետական ձեռնարկությունները, որոնք տնտեսապես ապահովում են այս ռեժիմի և դրա կոռումպացված շահառուների գոյությունը», – ասել է գերմանացի քաղաքական գործիչը։
Հիշեցնենք՝ կիրակի Աթենքից Վիլնյուս թռչող Ryanair ընկերության ինքնաթիռը հարկադիր վայրէջք էր կատարել Մինսկում։ Օդաչուներին տեղեկացրել էին օդանավում տեղադրված ռումբի մասին և նրանց խորհուրդ էին տվել վայրէջք կատարել Մինսկում։ Բելառուսը Միգ -29 կործանիչ էր բարձրացրել երկինք՝ ինքնաթիռն ուղեկցելու համար: Ինքնաթիռի վայրէջքից հետո բերման էր ենթարկվել ընդդիմադիր Ռոման Պրոտասևիչը՝ NEXTA-ի նախկին գլխավոր խմբագիրը։ Իսկ օդանավում ոչ մի ռումբ չէր հայտնաբերվել: Պրոտասևիչը, նրա ընկերուհին՝ Ռուսաստանի քաղաքացի Սոֆյա Սապեգան և մի քանի այլ անձինք չէին հասել Վիլնյուս:
Տաթև Ֆռանգյան
