14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
Էրդողանն ամերիկյան 20 խոշոր ընկերությունների ղեկավարների հետ քննարկելու է Թուրքիայում ներդրումների հարցը
Քաղաքականություն
25.05.2021 | 14:06
Թուրքիայի նախագահ Ռեջեփ Թայիփ Էրդողանը չորեքշաբթի տեսակոնֆերանսի ձևաչափով հանդիպելու է ԱՄՆ 20 խոշորագույն ընկերությունների ղեկավարների հետ՝ քննարկելու Թուրքիայում ներդրումներ կատարելու հարցը։ Այս մասին Reuters-ին հայտնել է երեք աղբյուր։
Նրանց տեղեկացմամբ՝ կոնֆերանսը կազմակերպել են ԱՄՆ Առևտրի պալատը, Թուրքիայի նախագահի աշխատակազմի ներդրումների գրասենյակը, ԱՄՆ-ում Թուրքիայի դեսպանատունն ու Թուրքիայի առևտրային պալատի ու ապրանքների բորսաների միությունը։ Աղբյուրներից մեկը լրատվամիջոցին հայտնել է, որ տեսակոնֆերանսն անցկացվելու է Բրյուսելում հունիսի 14-ին ՆԱՏՕ-ի գագաթնաժողովի շրջանակում Բայդենի ու Էրդողանի հանդիպման նախօրեին։
Մեկ այլ աղբյուր էլ հայտնել է, որ ԱՄՆ կառավարությունը ներգրավված չէ այդ կոնֆերանսի ծրագրմանը։ Առայժմ հայտնի չէ նաև, թե որ ընկերություններն են մասնակցելու առցանց հանդիպմանը։
«Սա փորձ է՝ ստուգելու ԱՄՆ ընկերությունների հետ հարաբերությունները Բայդենի հետ դեմ առ դեմ հանդիումից առաջ»,- լրատվամիջոցին ասել է աղբյուրներից մեկը, որը ցանկացել է անանուն մնալ։
Նա նաև նշել է, որ Անկարան ցանկանում է ներքին ու միջազգային լսարանին մեսիջ ուղարկել, որ Թուրքիան կարևոր գործընկեր է։
Մեկ այլ տեղեկացված աղբյուրն էլ Reuters-ին հայտնել է, որ Microsoft-ի ու Netflix-ի տնօրենները մասնակցելու են տեսակոնֆերանսին։ Ընկերությունները, սակայն, չեն արձագանքել լրատվամիջոցի՝ մեկնաբանության խնդրանքին։
Մեկնաբանություններից հրաժարվել են նաև Թուրքիայի նախագահականի ներդրումային գործակալությունն ու TOBB-ն։
Էմմա Չոբանյան
