Ադրբեջանում «Իսլամական պետության» ադրբեջանցի անդամ է ձերբակալվել

Ադրբեջանի Պետական անվտանգության ծառայությունը հաղորդում է այդ երկրի քաղաքացու ձերբակալման մասին, որը կռվել է «ԻԼԻՊ» ահաբեկչական խմբավորման զինյալների շարքում։ Տեղական լրատվամիջոցների հաղորդմամբ՝ Ադրբեջանի քաղաքացի Օրհան Ջամալովը 2014 թվականին անօրինական կերպով տեղափոխվել է Սիրիա՝ մասնակցելու «Իսլամական պետության» անօրինական զինված խմբավորումների կազմում գործողությունների։

Ավելի վաղ Ջամալովն արդեն դատապարտվել էր «Անտառային եղբայրներ» անօրինական զինված խմբավորմանն անդամակցելու համար, որը գործում էր Ադրբեջանի Զաքաթալայի շրջանում։ Ազատ արձակվելուց հետո Ջամալովը 2014թ․ Շամիլ անունով մարդու միջոցով տեղափոխվել է Թուրքիա, այնտեղից էլ անօրինական ճանապարհով՝ Սիրիայի Ռաքքա քաղաք։

Կան հիմնավոր կասկածներ, որ Ջամալովը միացել է «Ազերի Ջամաաթ» անօրինական զինված խմբավորմանը, որը կապված է ահաբեկչական «Իսլամական պետության» հետ, և մասնակցել զորավարժությունների ու զինված հակամարտությունների այդ հանցավոր խմբի կազմում։

Այդ փաստերի հիման վրա Ջամալովին մեղադրանք է առաջադրվել երկրի քրեական օրենսգրքի 12․1, 218․2 և 283-1․3 հոդվածներով։ Նա կալանավորվել է։ Գործի քննությունը շարունակվում է։

Հիշեցնենք, որ վերջերս էլ Ադրբեջանի երկու բնակիչ էր ձերբակալվել՝ «Թալիբան» ահաբեկչական խմբավորման մեջ ներգրավվելու համար։ Լրատվամիջոցների փոխանցմամբ՝ Ադրբեջանի քաղաքացիներ Յահյա Մամեդովն ու Էլնուր Ջաբիևն անօրինական խմբավորումների կազմում մասնակցել են հակամարտությունների երկրի սահմաններից դուրս։

Էմմա Չոբանյան