30.06.2026 | 09:48
Էնցո Մարեսկան` «Մանչեսթեր Սիթիի» գլխավոր մարզիչ
Lufthansa-ի օդանավը Մինսկից Ֆրանկֆուրտ չի մեկնել՝ ահաբեկչական հարձակման սպառնալիքի պատճառով
Քաղաքականություն
24.05.2021 | 18:59
Մինսկի ազգային օդանավակայանից երկուշաբթի Ֆրանկֆուրտ չի մեկնել Lufthansa ավիաընկերության ինքնաթիռը։ Պատճառը նախապատրաստվող ահաբեկչության մասին հաղորդակցությունն է։ Այս մասին հայտնել են Մինսկի օդանավակայանից, հաղորդում է «Ինտերֆաքսը»։
«Ազգային օդանավակայանի էլեկտրոնային հասցեին չբացահայտված անձից հաղորդագրություն է ստացվել Lufthansa ավիաընկերության՝ Մինսկից-Ֆրանկֆուրտ թռչող LH1487 չվերթի դեմ ահաբեկչական գործողություն կատարելու վերաբերյալ։ Չվերթը նախատեսված էր ժամը 14։20-ին։ Սույն չվերթի թռիչքը կանգեցվել է»,- ասված է հաղորդագրության մեջ։
Տեղեկացվում է, որ կատարվածի մասին տեղեկացվել են բոլոր շահագրգիռ կողմերը։
Հիշեցնենք՝ կիրակի Աթենքից Վիլնյուս թռչող Ryanair ընկերության ինքնաթիռը հարկադիր վայրէջք է կատարել Մինսկում։ Օդաչուներին տեղեկացրել են օդանավում տեղադրված ռումբի մասին և նրանց խորհուրդ են տվել վայրէջք կատարել Մինսկում։ Բելառուսը Միգ-29 կործանիչ է բարձրացրել երկինք՝ ինքնաթիռն ուղեկցելու համար:
Ինքնաթիռի վայրէջքից հետո բերման է ենթարկվել ընդդիմադիր Ռոման Պրոտասևիչը՝ NEXTA-ի նախկին գլխավոր խմբագիրը, իսկ օդանավում ոչ մի ռումբ չի հայտնաբերվել: Պրոտասևիչը, նրա ընկերուհին՝ Ռուսաստանի քաղաքացի Սոֆյա Սապեգան և մի քանի այլ անձինք չեն հասել Վիլնյուս:
Տաթև Ֆռանգյան
