Լիտվան առաջարկել է դադարեցնել Բելառուսի անդամակցությունը Ինտերպոլին

Լիտվան առաջարկել է դադարեցնել Ինտերպոլին Բելառուսի անդամակցությունը, որի իշխանություններն օգտագործում են միջազգային իրավական գործիքները՝ քաղաքական ընդդիմության ներկայացուցիչներին հետապնդելու համար: Այս առաջարկը երկուշաբթի արել է Սեյմի արտաքին քաղաքական հանձնաժողովի նախագահ Զիգիմանտաս Պավիլիոնիսը:

«Մենք առաջարկում ենք ՆԱՏՕ-ի անդամներին և ԵՄ երկրներին՝ ավելի խորը պատժամիջոցներ սահմանել Բելառուսի իշխանությունների դեմ, այդ թվում՝ քննարկել Ինտերպոլին այս երկրի անդամակցության հարցը, քանի որ այն միջազգային գործիքներն օգտագործում է ահաբեկչական գործողություններ իրականացնելու համար», – ասել է նա LRT ազգային ռադիոյի եթերում:

Նամակը Ինտերպոլի ղեկավարությանն ուղարկել է Լիտվայի ՆԳՆ ղեկավար Ագնե Բիլոտայտեն: «Անհրաժեշտ է անել հնարավոր ամեն ինչ, որպեսզի միջազգային իրավական գործիքները չօգտագործվեն [քաղաքական] հետապնդումների և բռնաճնշումների համար», – ասված է դրանում։

Հիշեցնենք՝ կիրակի Աթենքից Վիլնյուս թռչող Ryanair ընկերության ինքնաթիռը հարկադիր վայրէջք է կատարել Մինսկում։ Օդաչուներին տեղեկացրել են օդանավում տեղադրված ռումբի մասին և նրանց խորհուրդ են տվել վայրէջք կատարել Մինսկում։ Բելառուսը Միգ -29 կործանիչ է բարձրացրել երկինք՝ ինքնաթիռը ուղեկցելու համար:

Ինքնաթիռի վայրէջքից հետո բերման է ենթարկվել ընդդիմադիր Ռոման Պրոտասևիչը՝ NEXTA-ի նախկին գլխավոր խմբագիրը։ Իսկ օդանավում ոչ մի ռումբ չի հայտնաբերվել: Պրոտասևիչը, նրա ընկերուհին՝ Ռուսաստանի քաղաքացի Սոֆիա Սապեգան  և մի քանի այլ անձինք չեն հասել Վիլնյուս:

Տաթև Ֆռանգյան