Թբիլիսիում թուրքական ընկերության դեմ բողոքի ցույցերը շարունակվում են

Ռիոնի գետի վրա «Նամախվանի» հիդրոէլեկտրակայանի կառուցման հակառակորդները, որոնք կիրակի օրը լայնամասշտաբ բողոքի ցույցեր են անցկացրել Թբիլիսիում, երկուշաբթի Հանրապետության հրապարակից տեղափոխվել են խորհրդարանի շենք մոտ, որտեղ ակնկալում են հանդիպել օրենսդիր մարմնի նախագահի հետ, լրագրողներին հայտնել է բողոքի ցույցի կազմակերպիչ Վարլամ Գոլետիանին:

Կիրակնօրյա ակցիայի մասնակիցները վերջնագիր են ներկայացրել իշխանություններին: Նրանք պահանջում են խզել թուրքական ENKA ընկերության հետ հիդրոէլեկտրակայանների կառուցման պայմանագիրը և Վրաստանի էկոնոմիկայի և կայուն զարգացման նախարար Նաթիա Թուրնավայի հրաժարականը, ինչի համար իշխանություններին ժամանակ է տրվել մինչև երկուշաբթի ժամը 12:00-ն, որից հետո ակցիայի կազմակերպիչները սպառնացել են կաթվածահար անել մայրաքաղաքի երթևեկությունը:

Վերջնագրի լեզուն, որի մասին իշխանությունների հետ խոսում են «Նամախվանի» հիդրոէլեկտրակայանի կառուցման հակառակորդները, ոչ այլ ինչ է, քան «մութ» 90-ականների մասունք, – հայտարարել է Վրաստանի վարչապետ Իրակլի Ղարիբաշվիլին ՝ մեկնաբանելով Թբիլիսիում ցուցարարների պահանջները, գրում է Sputnik-ի վրացական ծառայությունը։

Հիշեցնենք՝ Նամախվանի հիդրոէլեկտրակայանի կառուցումը հետաձգվում է 2009 թվականից՝ տեղի բնակչության ցույցերի, ինչպես նաև շրջակա միջավայրի վրա ազդեցության ռիսկերի պատճառով։ ՀԷԿ-ի կառուցումը, որի նախագծային հզորությունը կազմում է 460 մվտ, սկսվել է 2020 թվականի ամռանը: Կառուցումն իրականացնում է թուրքական ENKA Insaat ve Sanayi A.S. ընկերությունը, իսկ ներդրումների ծավալը կազմում է 800 միլիոն ԱՄՆ դոլար։

Տաթև Ֆռանգյան