14.09.2026 | 19:08
«Արթիկ» ՔԿՀ-ի ծառայող է ձերբակալվել
Ադրբեջանի Մեջլիսի խոսնակը հայ գերիների մասին Եվրոպական խորհրդարանի ընդունած բանաձևն անվանել է թղթի կտոր
Քաղաքականություն
21.05.2021 | 12:31
Ադրբեջանից արձագանքել են նախօրեին Եվրոպական խորհրդարանի ընդունած բանաձևին, որը պարտադրում է Ադրբեջանին առանց որևէ նախապայմանի ազատ արձակել հայ ռազմագերիներին ու գերեվարված քաղաքացիական անձանց։
Ադրբեջանի Միլլի Մեջլիսի այսօրվա նիստում խոսնակ Սահիբա Գաֆարովան հայտարարել է, որ Եվրոպական խորհրդարանի ընդունած բանաձևը ափսոսանք է առաջացնում։ Նա նշել է, որ փաստաթուղթն ընդունվել է Ադրբեջանի դեմ «հայկական քարոզչության» ազդեցության ներքո։
«Դա ընդամենը թղթի կտոր է և չի արտացոլում Եվրոպական Միության վերաբերմունքը Ադրբեջանի նկատմամբ։ Ադրբեջանը հետաքրքրված է ԵՄ-ի հետ համապարփակ հարաբերությունների զարգացմամբ։ Եվրախորհրդարանում որոշ կողմնակալ խմբերի ջանքերը չեն կարող վնասել Ադրբեջանի ու ԵՄ-ի հարաբերություններին»,- ասել է Գաֆարովան։
Հիշեցնենք, որ վերոնշյալ բանաձևը Եվրոպական խորհրդարանն ընդունել էր նախօրեին 607 կողմ ձայնով։ Ի դեպ, Ադրբեջանի ԱԳՆ-ն դեռ որևէ կերպ չի արձագանքել այս բանաձևի ընդունմանը։
Էմմա Չոբանյան
