30.06.2026 | 11:46
Վենեսուելայում երկրաշարժերի զոհերի թիվը գերազանցել է 1700-ը
Ադրբեջանը պատասխանել է Հնդկաստանի ԱԳՆ-ի՝ Հայաստանի տարածքից ադրբեջանական զորքերը դուրս բերելու հայտարարությանը
Քաղաքականություն
20.05.2021 | 14:16
Ադրբեջանի արտաքին գործերի նախարարությունը պատասխանել է Հնդկաստանի ԱԳՆ-ի` նախօրեին արված հայտարարությանը, որով կոչ էր արվում Ադրբեջանին անհապաղ իր զորքերը հետ քաշել Հայաստանի սուվերեն տարածքից։
Ադրբեջանի ԱԳՆ մամուլի քարտուղար Լեյլա Աբդուլաևան հայտարարել է, որ Հայաստանի ու Ադրբեջանի միջև սահմանային հարցերի հիմնական պատճառը 2020թ-ի նոյեմբերից առաջ «Ադրբեջանի տարածքների օկուպացիան է, Հայաստանը խախտել է Ադրբեջանի միջազգային ճանաչված սահմաններն ու հիմա Բաքուն միայն վերականգնում է իր միջազգայնորեն ճանաչված սահմանները»։
«Շատ տարօրինակ է, որ Հնդկաստանի արտաքին քաղաքական գերատեսչությունը, որը վերջին 30 տարում ադրբեջանական տարածքներից հայկական օկուպացիոն ուժերի դուրսբերման կոչեր չէր անում, հիմա խոսում է զինված ուժերի դուրսբերման մասին։ Ակնհայտ է, որ այդ վերջին հայտարարությունն արվել է առանց հարցի տարբեր ասպեկտների մանրամասն ուսումնասիրության»,-ասել է Ադրբեջանի ԱԳՆ մամուլի քարտուղարը։
Հիշեցնենք, որ նախօրեին Հնդկաստանի արտաքին գործերի նախարարության խոսնակն ասել էր, որ Հնդկաստանը մտահոգությամբ է հետևում Հայաստանի ու Ադրբեջանի սահմանին տիրող իրավիճակին։
«Ռազմական տեղաշարժերի միջոցով սահմանային խախտումները կարող են ապակայունացնել իրավիճակն ու հանգեցնել ռազմական գործողությունների վերսկսման: Հորդորում ենք խախտած կողմին անհապաղ հետ քաշել զինված ուժերն ու կասեցնել ցանկացած հետագա սադրանք»,- հայտարարել էր խոսնակը:
Նա նաև ընդգծել էր, որ Հնդկաստանը մշտապես կողմ է արտահայտվել երկկողմ վեճերի խաղաղ կարգավորմանը՝ քաղաքական ու դիվանագիտական ճանապարհներով:
«Հարավային Կովկասի տարածաշրջանում խաղաղությունն ու կայունությունը կարևոր են տարածաշրջանային անվտանգության հեռանկարում»,- նշել էր Հնդկաստանի ԱԳՆ խոսնակը:
Էմմա Չոբանյան
