Ադրբեջանի ԱԳՆ-ն անդրադարձել է շիրակցի ռազմագերիներին՝ նրանց կրկին գերիներ չհամարելով

Ադրբեջանի ԱԳՆ մամուլի ծառայության պետ Լեյլա Աբդուլաևան կրկին խոսել է Ադրբեջանում պահվող հայ ռազմագերիների մասին։ Նա նշել է, որ, իբր, Ադրբեջանը հավատարիմ է միջազգային մարդասիրական իրավունքին ու վերադարձրել է բոլոր հայ ռազմագերիներին, որոնք ունեն գերու կարգավիճակ, ինչպես նախատեսված է եռակողմ հայտարարությամբ ու միջազգային մարդասիրական իրավունքով իր ստանձնած պարտավորություններով։

Աբդուլաևան կրկին պնդել է ադրբեջանական թեզը, որ հիմա Ադրբեջանում են գտնվում հայ «սադրիչներ», որոնք ապօրինաբար են ուղարկվել Ադրբեջանի տարածք 2020թ-ի նոյեմբերի 10 եռակողմ հայտարարությունից հետո։

«Ադրբեջանական կողմի հավաքած տվյալներով՝ ռազմական գործողությունների ավարտից հետո Հայաստանի Շիրակի մարզից Ադրբեջանի տարածք է անցել ավելի քան 60 հոգանոց խումբ»,- ասել է Աբդուլաևան՝ նշելով, որ, իբր, նրանք ահաբեկչական գործողություններ են իրականացրել՝ սպանելով 4 ադրբեջանցի զինծառայողի ու վիրավորել  մեկ քաղաքացիական անձի։

«Ադրբեջանը պահում է այդ անձանց կալանքի տակ օրինական հիմքերով, ինչպես միջազգային, այնպես էլ Ադրբեջանի ներքին օրենսդրությանը համապատասխան: Նրանք մեղադրվում են սպանություն կատարելու, դիվերսիայի ու այլ հանցանքների մեջ»,- ասել է Աբդուլաևան՝ նշելով, որ հիմա Ադրբեջանը մանրամասն ուսումնասիրում է ձերբակալված անձանց դեմ եղած ապացույցները։

Հիշեցնենք նաև, որ Հադրութի Հին Թաղեր ու Խծաբերդ բնակավայրերում դեկտեմբերի 16-ին՝ ռազմական գործողությունների ավարտից հետո, Շիրակի մարզի տարբեր համայնքների 62 զինվորականներ գերեվարվեցին Ադրբեջանի կողմից։ Նրանց նկատմամբ Ադրբեջանի իշխանությունները հարուցել են տարբեր քրեական գործեր, որակել դիվերսանտներ ու հրաժարվում են վերադարձնել։ 8 շիրակցիներ արդեն վերադարձել են․ հունվարի 28-ին Հայաստան վերադարձավ 5 շիրակցի գերի, փետրվարի 8-ին՝ ևս 5-ը, որոնցից 3-ը Գյումրիից։ Գերիների վերջին խումբը ՝ 3 ռազմագերի, Հայաստան վերադարձավ մայիսի 4-ին։ Նրանցից մեկը Շիրակի մարզից է։ Մյուս գերիները շարունակում են մնալ Ադրբեջանում։

Էմմա Չոբանյան