Գազայի հատվածում անհայտ թունավոր նյութերից մահեր են արձանագրվել

Գազայի հատվածում վերջին օրերին մահեր են արձանագրվել, հավանաբար՝ անհայտ թունավոր նյութերի ազդեցության հետևանքով։ Այս մասին գրում է ՏԱՍՍ-ը՝ վկայակոչելով Samaa News-ը։

«Մի քանի մարմին է տեղափոխվել «Աշ-Շիֆաա» բժշկական համալիր և, ինչպես պարզվել է դատաբժշկական փորձաքննության ընթացքում, մահվան պատճառ է դարձել շնչահեղձությունը՝ ակնհայտ նախանշաններով, որ նրանք թունավոր գազերի ազդեցության են ենթարկվել»,- նշել են անկլավի Առողջապահության նախարարությունից։

Այստեղ, սակայն, չեն հստակեցրել, թե ինչ հանգամանքներում են մարդիկ մահացել։

Իր հերթին, Sky News Arabia-ն, վկայակոչելով բժշկական աղբյուրները, հաղորդում է, որ պաղեստինցիների մահվան պատճառ է դարձել «իսրայելական բանակի կողմից արձակված թունավոր գազերը շնչելը»։

Հավելենք, որ պաղեստինյան աղբյուրները հաղորդում են Գազայի հատվածի ուղղությամբ իսրայելական հարվածների հետևանքով 72 զոհի մասին, այդ թվում՝ 17 երեխա և 6 կին։

Մայիսի 10-ից իսրայելական բանակն ու Գազայի հատվածի պաղեստինյան ռադիկալ ուժերը փոխադարձ հրթիռային հարվածներ են հասցնում։ Իրավիճակն այստեղ թեժացել է մայիսի սկզբին Արևելյան Երուսաղեմում Ալ-Աքսա մզկիթի մոտ անկարգություններից հետո, որտեղ ավելի քան 700 պաղեստինցի է տուժել։

Իսրայելի տվյալների համաձայն՝ այս ընթացքում իր տարածքի ուղղությամբ ավելի քան 1.600 հրթիռ է արձակվել, 6 իսրայելցի զոհվել է։ Իսրայելական բանակի հրամանատարությունը դիտարկում է Գազայում ցամաքային գործողություն իրականացնելու հարցը։