Սյունիքի առաջնագծում տեղի ունեցածի մանրամասները․ Արցախի կոչը՝ տարածքի դեօկուպացիայի մասին․ Լուրեր

Պաշտպանության նախարարությունը արձագանքել է տարածվող լուրերին, թե մարտեր են եղել Սյունիքում։ Նախարարությունը հայտնել է, որ մարտերի մասին տեղեկությունները կեղծ են, և պարզաբանել է տեղի ունեցածը։ Հաղորդագրության համաձայն՝ մայիսի 12-ի վաղ առավոտյան ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում։ Հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները, ինչից հետո սկսվել են բանակցություններ՝ ստեղծված իրավիճակը հարթելու ուղղությամբ։

—

2020 թ. նոյեմբերի 10-ին հաստատված հրադադարն Ադրբեջանին չի ազատում պատասխանատվությունից։ Այս մասին հայտարարություն է տարածել Արցախի ԱԳՆ-ն։ Հայտարարության համաձայն՝ երկարաժամկետ խաղաղության հաստատումը ենթադրում է Արցախի դեմ վերջին զինված ագրեսիայի հետևանքների շտկում, այդ թվում՝ Արցախի Հանրապետության տարածքների դեօկուպացիա, ռազմագերիների և պատանդների ազատ արձակում, ինչպես նաև բանակցությունների բարեխիղճ վարում՝ ԵԱՀԿ Մինսկի խմբի համանախագահության հովանու ներքո՝ հակամարտության համապարփակ կարգավորման նպատակով:

—

Դիզվառելիքի մատակարարման ուշացումների պատճառով, այսօր «Երևանի ավտոբուս» ՓԲԸ-ի ավտոբուսները առավոտվանից չեն սպասարկել հանրությանը։ Այս մասին հայտարարել է Երևանի քաղաքապետի խոսնակը։

Այս հայտարարությանը արձագանքել է վառելիք մատակարարող CPSOil ընկերությունը։ Հայտարարության համաձայն՝ իրենք դադարեցրել են վառելիքի մատակարարումը, քանի որ ամիսներով չեն ստացել վառելիքի դիմաց վճարները։