11.10.2026 | 12:06
Հայ զինծառայողները վարժանքներ են անցկացրել «Արամազդ» հրետանային միջոցով և նոր տեխնիկայով
Էրդողանի կուսակցությանն աջակցությունը նվազում է, քանի որ թուրքերի 27 տոկոսը կիսասոված է․ հետազոտություն
Քաղաքականություն
11.05.2021 | 21:51
Թուրքիայի քաղաքացիների 27 տոկոսը սովի մակարդակում է, ինչը բերել է իշխող «Արդարություն և զարգացում» կուսակցության վարկանիշի անկմանը։ Այս մասին ասել է Metropoll Research ընկերության հիմնադիր Օզեր Սենջարը, գրում է Ահվալ գործակալությունը՝ վկայակոչելով Bianet-ին, որը հրապարակել է Metropoll-ի ապրիլ ամսվա ամենամսյա հանրային հարցման արդյունքները։
Հարցման արդյունքներով պարզվել է, որ թուրքերի 27 տոկոսը չի կարողանում իր հիմնական կարիքները բավարարել։
Սենջարը պատմել է, որ առաջին անգամ են իրենց հարցման արդյունքները համընկնում պետական վիճակագրության հետ, որը հրապարակել է Թուրքական վիճակագրական ինստիտուտը։ Նա նշյալ խմբի թուրքերին բնութագրել է որպես «կիսասոված»։
«Անցյալ տարի 9 կետով իջել է նրանց մակարդակը, որոնք ասում էին, որ կարող են իրենց բոլոր կարիքները բավարարել։ Այլ կերպ ասած՝ նրանց մակարդակը, որոնք կարող են իրենց բոլոր տեսակի կարիքները բավարարել, տարվա ընթացքում ընկել է 33 տոկոսով։ Կարծում եմ՝ սա մեծ թիվ է, շատ նշանակալի դեպք։ Ինչպե՞ս կարող է հասարակությունը մեկ տարվա ընթացքում այդպես աղքատանալ։ Այդպիսի բան կարող է լինել միայն պատերազմի ժամանակ»,- ասել է Սենջարը։
Հետազոտությունը ցույց է տալիս, որ շատ թուրքերի կյանքը ծանր է կորոնավիրուսի համավարակի պատճառով։ Սենջարն ասել է, որ անցյալ տարի շատ աշխատատեղեր ու բիզնեսներ են փակվել, իսկ իրավիճակին չի օգնում թուրքական կառավարության կողմից տրված օգնությունը։
«Կառավարության կողմից տրված օգնությունը մարդկանց, որոնք համավարակի հետևանքով վնասներ են կրել, ամենացածրն է աշխարհում»,- նշել է Սենջարը։
Նա նաև ներկայացրել է, որ հարցման տվյալներով՝ իշխող կուսակցության վարկանիշը վատթարանում է քաղաքացիների տնտեսական բարեկեցության նվազման ֆոնին։ Տվյալների համաձայն՝ կուսակցության ընտրողները բաժանված են նրանց, որոնք տեսնում են Թուրքիայում կյանքի իրավիճակի բարելավում, և նրանց, որոնք տեսնում են վատթարացում։
Metropoll-ի տվյալները ցույց են տալիս, որ «Արդարություն ու զարգացում» կուսակցության վարկանիշը վերջին երեք տարիներին ընկել է 8․5 տոկոսով՝ տնտեսության թուլացման հետևանքով։
«Տեսնում ենք, որ կուսակցության ընտրողների թիվը վերջին երեք տարում 42․6 տոկոսից իջել է 34․1 տոկոսի, 8․5 տոկոսի անկում կա»,- ասել է Սենջարը։
Էմմա Չոբանյան
