11.10.2026 | 20:00
15 հազար մարդ Հայաստան է գալիս․ ի՞նչ է սպասվում COP17-ում․ բնությունը մարդուց պաշտպանելու ՇԵՐՏԵՐԸ
Լոնդոնը մտադիր է հսկայական ներդրումներով կանխել Շոտլանդիայի անկախացումը
Քաղաքականություն
10.05.2021 | 15:53
Բորիս Ջոնսոնի կառավարությունը պատրաստվում է բազմամիլիարդանոց միջոցներ ուղղել Շոտլանդիայում խոշոր ենթակառուցվածքային ծրագրերի համար, որպեսզի թույլ չտա Մեծ Բրիտանիայից նրա անջատումը։ Այս մասին գրում է ՏԱՍՍ-ը՝ վկայակոչելով The Times-ը։
Նշվում է, որ բրիտանական իշխանությունները ներկայում քննարկում են, մասնավորապես, Շոտլանդիայում տրանսպորտային նախագծերում և Ազգային առողջապահական ծառայությունում ներդրումների հնարավորությունը։ Ջոնսոնի կառավարությունը, ըստ պարբերականի, մտադիր է բյուջեից ուղղակիորեն միջոցներ ուղղել Շոտլանդիայի կոնկրետ քաղաքապետարաններին՝ շրջանցելով տեղական կառավարությանը։
Բացի այդ, բիզնեսի աջակցման շրջանակում Լոնդոնն Աբերդինի ու Ինվերնեսի նավահանգիստներին կարող է հատուկ կարգավիճակ տալ, ինչը ենթադրում է հարկային արտոնյալ պայմաններ։
Պարբերականն ընդգծում է, որ այդպիսով Միացյալ Թագավորության կառավարությունը ցանկանում է «ոչ թե խոսքով, այլ գործով» ցուց տալ Շոտլանդիայի բնակիչներին մի պետության մեջ համատեղ գոյակցելու առավելությունը։
Բրիտանական ղեկավար շրջանակներում, The Times-ի տվյալներով, հստակ համոզմունք կա, որ այդպիսի մոտեցումը կարող է կանխարգելել անկախության երկրորդ հանրաքվեի անցկացումը Շոտլանդայում։ Նշվում է նաև, ենթակառուցվածքային նախագծերում ներդրումների հարցը, հնարավոր է, կքննարկվի Ջոնսոնի՝ Շոտլանդիայի, Ուելսի, Հյուսիսային Իռլանդիայի ղեկավարության հետ հանդիպման ընթացքում, որի անցկացման գաղափարի մասին Բրիտանիայի վարչապետը հայտարարել էր շաբաթ։
Մեծ Բրիտանիան ներկայիս վարչատարածքային սահմաններում պահելու հարցը կրկին սկսեց սրվել, երբ մայիսի 6-ին Շոտլանդիայում անցկացված ընտրություններում տեղական ազգային խորհրդարանում կրկին հաղթեց Շոտլանդիայի ազգային կուսակցությունը, որը 129 տեղանոց խորհրդարանում 64 տեղ է ստացել։ Հաշվի առնելով նաև, որ «Կանաչներն» իրենց հերթին 8 տեղ են ստացել և նույնպես սատարում են Բրիտանիայից անկախացումը, անջատման կողմնակիցները մեծամասնություն ունեն խորհրդարանում ու միասին կարող են առաջ տանել անկախության շուրջ կրկնակի հանրաքվե անցկացելու գաղափարը։
Նշենք, որ Շոտլանդիայի անկախության հանրաքվեն անցկացվել է 2014 թվականին, որի արդյունքներով մասնակիցների առնվազն 55 տոկոսը կողմ էր արտահայտվել Էդինբուրգի ու Լոնդոնի միջև դաշինքի պահպանմանը։
Էմմա Չոբանյան
