18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Ադրբեջանի ԱԳՆ-ն արձագանքել է Ֆրանսիայի ու Կանադայի՝ հայ գերիներին ազատ արձակելու կոչերին
Քաղաքականություն
07.05.2021 | 15:53
Ադրբեջանի ԱԳՆ-ն պատասխանել է Ֆրանսիայի ու Կանադայի ԱԳ նախարարությունների՝ հայ գերիներն ազատ արձակելու մասին հայտարարություններին։ Մասնավորապես, Ադրբեջանի ԱԳՆ մամուլի ծառայության ղեկավար Լեյլա Աբդուլաևան ասել է, որ Բաքուն Երևանին 70 ռազմագերու է վերադարձրել պատերազմի ավարտից հետո՝ իր ոճով կրկին Հայաստանին մեղադրելով, իբր, հումանիտար իրավունքի խախտման մեջ։
«Մենք Կանադայի ու Ֆրանսիայի ԱԳ նախարարությունների ուշադրությունն ենք հրավիրում այն բանի վրա, որ հայկական կողմը մինչ այժմ չի կատարում միջազգային հումանիտար իրավունքով նախատեսված իր պարտավորությունները»,- հայտարարել է Աբդուլլաևան։
Նա նաև նշել է, որ եթե Ֆրանսիայի ու Կանադայի ԱԳՆ-ներն ուզում են օբյեկտիվ, այլ ոչ թե միակողմանի մոտեցում ցուցաբերել, ապա պետք է Հայաստանի կոչ անեն՝ կատարել միջազգային մարդասիրական իրավունքով նախատեսված պարտավորություններն ու «զերծ մնալ քայլերից, որոնք խոչընդոտում են տարածաշրջանում խաղաղության հաստատմանը»։
«Հակառակ դեպքում՝ դա լրջագույն կերպով կխաթարի ադրբեջանական հասարակության մեջ այդ երկրների հանդեպ վստահությունը»,- ասել է նա։
Հիշեցնենք՝ Կանադայի ու Ֆրանսիայի ԱԳ նախարարությունները հայտարարություններ են տարածել, որում ողջունել են Բաքվի կողմից 3 հայ գերիների ազատ արձակումն ու կոչ արել՝ անհապաղ ազատ արձակել բոլոր հայ ռազմագերիներին։
Էմմա Չոբանյան
