Շիրակի մարզում կորոնավիրուսի դեմ պատվաստման գործընթացը բավական ակտիվ է ընթանում

Շիրակի մարզում կորոնավիրուսի դեմ պատվաստման գործընթացը մեկնարկել է ապրիլի 15-ից։ Factor.am-ի հետ զրույցում Շիրակի մարզպետարանի առողջապահության ու սոցիալական ապահովության վարչության պետի ժամանակավոր պաշտոնակատար Լեյլի Ասլանյանը տեղեկացրեց, որ հանրապետության մյուս մարզերի համեմատ՝ Շիրակում գործընթացը բավական ակտիվ է։

«Իհարկե՝ նաև մասնագետներն են աշխատում, մենք խորհրդակցություն ենք անցկացրել իմունականխարգելման պատասխանատուների ու տնօրենների հետ։ Դրանից հետո բավական ակտիվացել է պատվաստման գործընթացը»,- ասաց Լեյլի Ասլանյանը։

Նա նշեց, որ հանրային վայրերում ևս նախատեսում են իրազեկման աշխատանքներ իրականացնել։

«Նախատեսվում է, որ հանրային վայրում շարժական խումբ կլինի, կփորձենք նաև քաղաքացիներին իրազեկել, իրազեկող նյութեր տարածել, ինչպես նաև, եթե ցանկություն ունեցողներ լինեն, կպատվաստենք»,- ասաց Լեյլի Ասլանյանը։

Երեկվա ամփոփ տվյալներով՝ մարզում արդեն 557 մարդ է պատվաստվել։

Շիրակի մարզը 1․500 դեղաչափ «AstraZeneca» և 342 դեղաչափ «Sputnik V» պատվաստանյութ է ստացել։ Չինական պատվաստանյութ մարզը դեռևս չի ստացել։

Մարզպետարանի պատասխանատուի հավաստմամբ՝ համավարակային իրավիճակը մարզում կառավարելի է, վերջին օրերին նկատվում է վարակման դեպքերի ցուցանիշի անկում։

Ընդհանուր առմամբ, մարզում բուժվում է կորոնավիրուսով 129 հիվանդ, որից 58-ը՝ «Գյումրի» բժշկական կենտրոնում, 71-ը՝ Գյումրու ինֆեկցիոն հիվանդանոցում։

Էմմա Չոբանյան