Հնդկաստանում կորոնավիրուսը քաղաքներից գյուղեր է տեղափոխվում․ երկրում նոր հակառեկորդներ են գրանցվում

Հնդկաստանում COVID-19-ի վարակման նոր հակառեկորդ է գրանցվել, մեկ օրում վարակակիրների թիվն ավելացել է 412,262-ով։ Մահվան դեպքերի թվով ևս Հնդկաստանը նոր հակառեկորդ է գրանցել՝ մեկ օրում մահվան դեպքերի թիվը հասել է  3,980-ի։ Հնդկաստանում կորոնավիրուսային վարակի երկրորդ ալիքը կաթվածահար է արել առողջապահական համակարգն ու քաղաքներից դեպի գյուղեր է տարածվում, գրում է Reuters-ը։

Առողջապահության նախարարության տվյալները ցույց են տալիս, որ COVID-19-ով վարակվածների թիվն աշխարհի երկրորդ ամենաբազմամարդ երկրում հասել են 21 միլիոնի, իսկ մահացությունների թիվը ՝ 230.168-ի:
Երկրի իշխանությունները կանխատեսում են վարակի տարածման երկրորդ ալիքի պիկը։

Առողջապահության համաշխարհային կազմակերպությունն իր շաբաթական զեկույցում հայտնել է, որ հիվանդանոցները փորձում են մահճակալներ և թթվածին գտնել , քանի որ վարակակիրների թիվը գնալով ավելանում է։
Համաձայն ԱՀԿ զեկույցի՝ Հնդկաստանում անցյալ շաբաթ գրանցված դեպքերի թիվը հավասար է աշխարհում գրանցված կորոնավիրուսի դեպքերի գրեթե կեսին և մահվան դեպքերի գրեթե մեկ քառորդին:

Բժշկական փորձագետներն ասում են, որ Հնդկաստանի իրական թվերը կարող են լինել հինգից 10 անգամ ավելին, քան պաշտոնական ցուցանիշն է:

Հնդկաստանի COVID-19 ճգնաժամը առավել սուր է եղել  Նյու Դելիում, ի թիվս այլ քաղաքների, բայց գյուղական վայրերում, որտեղ բնակվում է Հնդկաստանի 1.3 միլիարդ բնակչության գրեթե 70% -ը, սահմանափակ առողջապահական համակարգն ավելի շատ մարտահրավերներ է առաջացնում:

«Իրավիճակը վտանգավոր է դարձել գյուղերում», – ասում է Սուրեշ Կումարը՝ մարդու իրավունքների բարեգործական կազմակերպության Manav Sansadhan Evam Mahila Vikas Sansthan- ի համակարգողը:

Երկրի հյուսիսային Ուտար Պրադեշ նահանգի որոշ գյուղերում, որտեղ աշխատում է հիմնադրամը, «մահեր կան գրեթե յուրաքանչյուր երկրորդ տանը»,  ասել է նա:

Տաթև Ֆռանգյան