27.04.2026 | 09:29
ՀՀ տարածքում ավտոճանապարհները հիմնականում անցանելի են
Պուտինն ու Էրդողանը քննարկել են ԼՂ հակամարտության կարգավորմանն առնչվող հարցեր
Քաղաքականություն
05.05.2021 | 18:55
ՌԴ նախագահ Վլադիմիր Պուտինն ու Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել, որի ընթացքում քննարկել են ԼՂ հակամարտության կարգավորմանն առնչվող հարցեր։ Այս մասին տեղեկանում ենք Կրեմլի պաշտոնական կայքից։
«Անդրադարձ է եղել ԼՂ հակամարտության կարգավորման խնդիրներին, այդ թվում՝ հրադադարի պահպանման ռեժիմի վերահսկման ռուս-թուրքական համատեղ կենտրոնի շրջանակում գործունեության և հակամարտության գոտում բոլոր ռազմական գործողությունների համատեքստում»,- ասված է Կրեմլի տարածած հայտարարության մեջ։
Պուտինն ու Էրդողանը քննարկել են նաև կորոնավիրուսի դեմ «Սպուտնիկ V» ռուսական պատվաստանյութը թուրքական ձեռնարկություններում արտադրելու և մայիսից այս դեղամիջոցը Թուրքիային մատակարարելու հետ կապված հարցեր։
«Մանրամասն քննարկվել է կորոնավիրուսային վարակի տարածման դեմ պայքարը, այդ թվում նաև՝ հաշվի առնելով Թուրքիայում ստեղծված համաճարակաբանակ իրավիճակը»,- հայտնել է Կրեմլի մամլո ծառայությունը։
Նշվում է, որ «ընդգծվել է այս ուղղությամբ գործնական համագործակցության հարցում ՌԴ պատրաստակամությունը»։
«Խոսքը գնում է հրատապ՝ սկսած արդեն իսկ այս ամսից ռուսական «Սպուտնիկ V» պատվաստանյութի մատակարարումների կազմակերպման մասին»,- նշել են Կրեմլից՝ հավելելով, որ «մշակվում է նաև թուրքական ձեռնարկություններում համատեղ արտադրություն սկսելու հնարավորությունը»։
Տաթև Ֆռանգյան
