31.10.2026 | 10:43
Հայաստանի չեմպիոնը հաղթական խաղով է ավարտել պայքարը ֆուտզալի Չեմպիոնների լիգայում. ՏԵՍԱՆՅՈՒԹ
Պատգամավոր Աննա Գրիգորյանն արտահերթ ընտրություններին կմասնակցի «Վերածնվող Հայաստան» կուսակցության կազմում
Քաղաքականություն
05.05.2021 | 13:43
«Իմ քայլը» դաշինքի ցուցակով ընտրված, այնուհետև խմբակցությունը լքած պատգամավոր Աննա Գրիգորյանն առաջիկա արտահերթ խորհրդարանական ընտրություններին կմասնակցի «Վերածնվող Հայաստան» կուսակցության կազմում: Այս մասին նա ասաց խորհրդարանում լրագրողների հետ զրույցում։
«Որոշում եմ կայացրել շարունակել իմ քաղաքական ուղին «Վերածնվող Հայաստան» կուսակցության հետ: Կուսակցությունը ստեղծվել է՝ հիմքում ունենալով Սյունիքը: Այն հետպատերազմյա Հայաստանում ստեղծված կուսակցություն է, որը ստեղծվել է անհրաժեշտաբար: Գործող իշխանությունը համապատասխան ջանքեր և արդյունավետ գործողություններ չի իրականացրել և, մեծ հաշվով, անտարբերության է մատնել Սյունիքը»,- ասաց Գրիգորյանը:
Նշենք, որ Սյունիքի նախկին մարզպետ Վահե Հակոբյանի կողմից «Վերածնվող Հայաստան» կուսակցության ստեղծման մասին հայտարարվել է շուրջ մեկ ամիս առաջ։ Լրագրողի հարցին՝ ճի՞շտ են տեղեկությունները, որ «Վերածնվող Հայաստան»-ն առաջիկա արտահերթ ընտրություններին մասնակցելու է ՀՀ երկրորդ նախագահ Ռոբերտ Քոչարյանի հետ դաշինքով, Աննա Գրիգորյանը պատասխանեց, որ առայժմ նման պնդում չի կարելի անել։
«Քանի որ վերջնական որոշում չկա, չի հայտարարվել։ Այս պահին կոնսուլտացիաներ են գնում, և առնվազն տարօրինակ է, որ նման պնդում կարելի է անել։ «Բոլորս գիտենք»-ով չի, եթե առաջիկայում վերջնական որոշման գան, կարծում եմ՝ կհայտարարվի»,- նշեց Գրիգորյանը։
Անժելա Պողոսյան
