28.10.2026 | 17:17
Զորավարժարաններից մեկում վրանային մեծ ավան է կառուցվում․ Սուրեն Պապիկյան․ ՏԵՍԱՆՅՈՒԹ
Վերաքննիչ դատարանը Օնիկ Գասպարյանի բողոքը բավարարել է
Հասարակություն
04.05.2021 | 17:51
ՀՀ Վերաքննիչ վարչական դատարանը՝ նախագահությամբ դատավոր Կարեն Ավետիսյանի, ՀՀ ԶՈՒ Գլխավոր շտաբի նախկին պետ Օնիկ Գասպարյանի բողոքը բավարարելու մասին որոշում է կայացրել։ Օնիկ Գասպարյանի փաստաբան Արթուր Հովհաննիսյանը Factor.am-ի հետ զրույցում մանրամասնեց, թե ինչ հայց է բավարարել դատարանը և ինչ է սպասվում։
«Մենք մի քանի հայց էինք ներկայացրել, որոնցով ասում էինք, որ ակտն առոչինչ է, ակտն անվավեր է, դատարանները հետ էին վերադարձնում՝ ասելով, որ ակտ չկա, քանի որ նախագահի կողմից այն չի ստորագրվել և ավտոմատ փաստն է արձանագրվել, հետևաբար՝ չեք կարող ակտը վիճարկել, պետք է այլ հայցով՝ իրավահարաբերությունների բացակայության հիմքով դիմեք դատարան, ինչն էլ արեցինք։
Մենք, այնուամենայնիվ, հոգու խորքում վստահ էինք, որ ակտ կա, որովհետև Սահմանադրությունն ասում է, որ իրավունքի ուժով ակտն է ընդունված համարվում, և որպեսզի ռիսկի չդիմենք, մենք որոշեցինք վերադարձրած որոշումները տանել Վերաքննիչ և թող ասեն՝ ակտ կա, թե՝ ոչ»,- նշեց Հովհաննիսյանը։ Փաստաբանի խոսքով՝ Վերաքննիչ դատարանը գտել է, որ ակտ կա, և հայցը կրկին պետք է Վարչական դատարանի դատավոր Լիանա Հակոբյանը քննի։
Հիշեցնենք, որ ՀՀ ԶՈՒ Գլխավոր շտաբի նախկին պետ Օնիկ Գասպարյանը երեք հայց է ներկայացրել ՀՀ Վարչական դատարան՝ ընդդեմ նախագահ Արմեն Սարգսյանի և վարչապետ Նիկոլ Փաշինյանի՝ վիճարկելով իրեն ԶՈՒ ԳՇ պետի պաշտոնից ազատելու որոշման իրավաչափությունը։
Լիլիթ Շաբոյան
