Սերժ Սարգսյանը գողական հասկացություններով որոշ խմբերի բացատրություն տալու կարիք է տեսնում. Բաբաջանյան. ՏԵՍԱՆՅՈՒԹ

Սերժ Սարգսյանն իր վերջին հարցազրույցում հայտարարել է, որ ինքը Նիկոլ Փաշինյանին չի պարտվել, այլ ավելի հզոր ուժերի է պարտվել՝ ակնարկելով, որ Փաշինյանի հետևում դրսի ուժեր են, որոնք տարբեր երկրներում են գտնվում: Factor.am-ի հետ զրույցում անդրադառնալով այս դիտարկմանը՝ ԱԺ անկախ պատգամավոր Արման Բաբաջանյանը նշեց, որ Սերժ Սարգսյանը նոր մարդ չէ քաղաքականության մեջ, հաստատապես հասկանում է, թե ինչ կարևոր բաղադրիչներ ունի իշխանությունը, և նա չի կարող չիմանալ, որ ինքն, ըստ էության, պարտվել է ժողովրդին, այն ժողովրդին, որի մասին քամահրանքով է խոսում:

«Ես չեմ բացառում, որ որոշակի տեխնոլոգիաներ օգտագործվել են, դրա համար եղել են անհրաժեշտ միջավայր և պայմաններ, անհրաժեշտ ցասում, և ինչ-որ ուժային կենտրոններ, երրորդ երկրներ դրանից օգտվել են, և այդ ամենն ավելի էսկալացրել է իրավիճակն ու անխուսափելի դարձրել Սերժ Սարգսյանի հրաժարականը: Բայց ես կուզեի, որ ՀՀ նախագահի պաշտոնը զբաղեցրած այդ անձնավորությունը, որի համար այդ արտաքին գործոնները և ուժային կենտրոնները շատ ավելի կարևոր և ազդեցիկ են, քան սեփական ժողովուրդը, մի պահ մտորեր և ավելի իմաստուն պատասխաններ գտներ:

Ես հասկանում եմ, որ Սերժ Սարգսյանի ընդդիմախոսները նրան կշտամբում են իշխանությունը Նիկոլ Փաշինյանին հանձնելու համար, և նա այդ շրջանակներին գողական հասկացություններով հաշվետու լինելու, բացատրություններ տալու անհրաժեշտություն է տեսնում: Բայց մենք գործ ունենք պետության հետ, և այն, ինչ տեղի է ունեցել երեք տարի առաջ բոլորիս աչքի առաջ, Սերժ Սարգսյանը չի կարող հերքել: Նա չի կարող հերքել այն, ինչն անհերքելի է: Սերժ Սարգսյանը չէր կարող տալ և առնել այն, ինչն իրեն չի պատկանել: Ընդամենը մեկուկես տարի էր անհրաժեշտ, որպեսզի բացահայտվեր այն ֆարսը, ըստ որի՝ ՀՀԿ-ն ստացել էր 750 հազարին մոտ ձայն, իսկ 2018թ. ՀՀԿ-ն 91 տոկոս պակաս ձայնով պարտվեց»,- նշեց Բաբաջանյանը:

Մանրամասները՝ տեսանյութում: