Արմեն Գրիգորյանը հանդիպել է Տաջիկստանի ԱԽ քարտուղար Նասրուլլո Մախմուդզոդային

Դուշանբեում անցնող ՀԱՊԿ անդամ պետությունների ԱԽ քարտուղարների կոմիտեի նիստի շրջանակներում կայացել է ՀՀ ԱԽ քարտուղար Արմեն Գրիգորյանի և Տաջիկստանի ԱԽ քարտուղար Նասրուլլո Մախմուդզոդայի հանդիպումը:

Հանդիպման մեկնարկին Արմեն Գրիգորյանը շնորհակալություն է հայտնել Նասրուլլո Մախմուդզոդային հայկական պատվիրակության ջերմ ընդունելության և ՀԱՊԿ անվտանգության խորհուրդների քարտուղարների կոմիտեի նիստը բարձր մակարդակով կազմակերպելու համար:

Արմեն Գրիգորյանը նշել է, որ մեր պետությունները արդեն երկար ժամանակ է ինչ հաջող աշխատանք են ծավալում ՀԱՊԿ շրջանակներում և համոզմունք է հայտնել, որ ժամանակն է նաև երկկողմանի ձևաչափով հարաբերությունների ակտիվացման համար:

Հայ-տաջիկական համագործակցության զարգացման նպատակով  պարոն Գրիգորյանը իր տաջիկ գործընկերոջ հետ կիսվել է ՀԱՊԿ շրջանակներում գործընկերների հետ երկկողմ համագործակցության կուտակված փորձով և իրենց արդյունավետությունը արդեն ցույց տված մեխանիզմներով, մասնավորապես նշելով ՀԱՊԿ անդամ պետությունների ԱԽ գրասենյակների միջև կնքվող համագործակցության պլանների մասին: Այս համատեքստում Արմեն Գրիգորյանը Նասրուլլո Մախմուդզոդային առաջարկեց սկսել երկկողմ աշխատանքներ նման փաստաթղթի մշակման նպատակով:

Կողմերը վստահություն հայտնեցին, որ նման փաստաթղթի առկայությունը լավ հիմք կդառնա երկու երկրների միջև անվտանգության ոլորտի մի շարք ուղղություններով փոխշահավետ աշխատանքների համար: